2022 оны хоёрдугаар ээлжийн цэрэг татлага нийслэлийн хэмжээнд аравдугаар сарын 20-23-ныг хүртэл явагдсан.
Энэ удаагийн цэрэг татлагын ирц болон цэргийн насны эрчүүдийн эрүүл мэндийн талаар НЗДТГ-ын Цэргийн штабын дарга, хурандаа Г.Ялалтаас тодруулахад “Нийслэлийн хэмжээнд цэрэг татлага 90 орчим хувийн ирцтэй зохион байгуулагдлаа. Цэрэг татлагад бүртгүүлсэн иргэд зохих ёсны шинжилгээг өгч, эрүүл мэндийн үзлэгт хамрагдсан.
Хоёрдугаар ээлжийн цэрэг татлагад хамрагдсан залуусын 30 орчим хувь нь эрүүл мэндийн шалтгаанаар тэнцээгүй. Түүнчлэн өргөдөл, гомдол, гачигдал болон бусад шалтгаанаар 10 орчим хувь нь чөлөөлөгдсөн. Одоогоор цэргүүд маань тус тусын анги, отряд дээрээ хуваарилагдсан бөгөөд цэргийн анхан шатны бэлтгэлдээ орж эхэлсэн байгаа” гэдгийг хэлэв.
Мөн тэрбээр “Энэ удаагийн цэрэг татлагын мэдээллээс харахад цэргийн насны залуусын дунд амны хөндийн өвчлөл их байгааг эмч нар онцолж байна. Өмнөх жилүүдтэй харьцуулбал шүдний өвчин өндөр үзүүлэлттэй гарсан гэсэн үг. Тодруулбал, шүд нь үрэвсэж идээлсэн, цоорч хорхойтсон тохиолдолд хилийн цэргийн анги, отряд руу хол явуулах боломжгүй болдог.Хөдөө эмнэлгийн суурь тоног төхөөрөмж хомс учраас эмчилгээ хийхэд хүндрэлтэй байдаг. Үүнээс шалтгаалж цэрэгт тэнцэж чадахгүй тохиолдол гарч байна.
Цэрэг татлагад хамрагдсан иргэдийн хэчнээн хувь нь эрүүл мэндийн шалтгаанаар тэнцээгүй, ямар өвчин түгээмэл байгаа талаарх нарийвчилсан тоон мэдээллийг одоогоор өгөх боломжгүй. Энэ талаарх дүн мэдээллийг нэгтгэж, тулгасны дараа илүү дэлгэрэнгүй мэдээлэл өгөх боломжтой” хэмээн хэллээ.
