“Шинэ хоршоо” хөдөлгөөний нээлттэй хаалганы өдөрлөг “Хөдөө аж ахуйн корпорац”ТӨХХК-ийн талбайд өнөөдөр боллоо. Бодлого тодорхойлогчдыг төлөөлж Монгол Улсын сайд, ЗГХЭГ-ын дарга Д.Амарбаясгалан өдөрлөгийг нээж үг хэлэхдээ “Бид зөвхөн уул уурхай шүтсэн улс биш, бид мал аж ахуйн эх орон юм. Бид мал аж ахуйн салбараас олсон орлогоороо чинээлэг амьдарч байгаагаа дэлхийд харуулах ёстой” хэмээн онцлов.
Төв аймгийн Эрдэнэсант сумын гавьяат малчин Д.Гомбо-Очир өдөрлөгт иржээ. Тэрээр “Засгийн газраас өрнүүлэх гэж буй “Шинэ хоршоо” хөдөлгөөн бол мал аж ахуйн салбарт хийж буй хувьсгал юм” гэв.
Уламжлалт мал аж ахуйд тулгамдаж буй байгаль, цаг уурын өөрчлөлтөөс шалтгаалсан сөрөг нөлөөллийг бууруулах тухай хуулийг өчигдөр УИХ-аар баталсан. Хууль батлагдсантай холбогдуулан Засгийн газраас хэрэгжүүлэх гэж байгаа “Шинэ хоршоо” хөдөлгөөн нь малчид хоршооны хэлбэрээр ажиллаж, хөрөнгө оруулалтын зээл авч, түүхий эдээ зах зээлд өндөр өртгөөр борлуулж ашиг орлого олж, чинээлэг амьдрахболомжийг бүрдүүлэх зорилготой юм.
Энэ талаар Монгол Улсын сайд, ЗГХЭГ-ын дарга Д.Амарбаясгалан хэлэхдээ:
-“Ирэх долоо хоногийн лхагва гарагт Засгийн газраас хөтөлбөр батална. Үүний дагуу 1400 орчим төрийн албан хаагчдыг орон нутагт, сум бүрт, өрх бүрт хүрч ажиллах томилолт өгч ажиллуулна. Нэг суманд нэг сургагч багш, нэг зөвлөх менежер, хоршоо байгуулах, арилжааны банктай хамтран ажиллах зөвлөгөө өгөхзэрэг хүмүүсийг нэг сарын хугацаатай томилж ажиллуулна. Ингээд “Шинэ хоршоо” хөдөлгөөн албан ёсоор эхэлж Засгийн газар, Монголбанк, арилжааны банкууд хамтран амжилттай хэрэгжүүлнэ. Гагцхүү малчид маань үүнийг зөв ойлгох хэрэгтэй. Хоршоо гэхээр хуучных мэтээр ойлгодог. Шинэ хоршоо гэж сайнойлгох хэрэгтэй. Хоршооны хэлбэрээр ажиллаж, үйлдвэрлэл явуулахад тодорхой хэмжээний тоног төхөөрөмж шаардлагатай болно. Иймд Засгийн газар нэг цэгийн үйлчилгээний төвийг байгуулна. Ирэх 7 хоногоос тоног төхөөрөмжийн үзэсгэлэн худалдааг тогтмол зохион байгуулахаар төлөвлөж байна” гэв.
“Шинэ хоршоо” хөдөлгөөний нээлттэй хаалганы өдөрлөгийг Засгийн газрын Хэрэг эрхлэх газар, ХХААХҮЯ, Зээлийн батлан даалтын сан, Жижиг, дунд үйлдвэрийн газар хамтран зохион байгуулсан юм. Өдөрлөгт 21 аймгийн Засаг даргын Тамгын газрын дарга нар, Хүнс хөдөө аж ахуйн газрын дарга нар, орон нутгийн хоршоологч, малчдын төлөөлөл, арилжааны банкны төлөөлөл оролцов. Мөн анхан, дунд хоршооны хэлбэрээр ажилладаг аж ахуйн нэгжүүдийн зарим төлөөлөл бараа бүтээгдэхүүнээ үзэсгэлэнд дэлгэжээ.
