Улаанбаатар хотын удирдлагын багаас утааг бууруулах дараагийн төлөвлөгөөг гаргаснаа өнөөдөр Засгийн газрын хуралдаанд танилцуулжээ.
Энэ талаар Хотын дарга Х.Нямбаатар мэдээлэв.
Тэрбээр “Яндангүй бүсийг зарлана. Тодруулбал, Бага тойруу орчим дахь Дөлгөөн нуур, 32, Гандан гэх зэргээр төвийн бүсийг хамруулна. Энэ бүсэд 20 мянган айл байх бөгөөд бүгд LPG буюу газаар халаалтаа шийдэх төр, хувийн хэвшлийн түншлэлийн гэрээг энэ сар шинийн баяраас өмнө байгуулахаар ажиллаж байна. Барилгын ажил 3 сард эхэлж, 2025 оны 10 дугаар сар гэхэд 20 мянган айлыг LPG хэрэглээнд шилжүүлэхээр төлөвлөсөн.
Нэмээд нефтийн дайвар бүтээгдэхүүн болох газын үйлдвэр байгуулах, ингээд 80 мянган айлыг уг шугам сүлжээнд холбох боломжтой дундын станцыг байгуулахаар гаднын мэргэжилтнүүдийг урьж ажиллуулж байна. Үйлдвэрийг 1 жилийн дотор барих боломжтой гэсэн урьдчилсан мэдээллийг өгч байгаа. Танай оронд хөрсөн дээр 30-40 хэм хүйтрэх тохиолдолд дамжуулах шугамыг хэрхэн дулаалж барих вэ гэдэг чухал байна гэдгийг хэлсэн.
LPG хэрэглээнд шилжихэд хамгийн гол хүндрэлтэй асуудал нь хэрэглэгчийн төлөх төлбөр. Аль нэг улсаас хараат болох, тэсэрч, дэлбэрэх эрсдэл бүхий систем угсрах, хэрэглэгч дааж давшгүй өр, төлбөрт унахаас урьдчилан сэргийлэх чухал” гэлээ.
