Хүний эрхийн үндэсний комисс /ХЭҮК/-оос хурдан морины хаврын уралдаантай холбоотой цаг үеийн асуудлаар мэдээлэл өгсөн.
Комиссын гишүүн Ж.Хунан, Сүүлийн үед морин уралдаанууд бооцоотой болж байна. Олон хүн оролцдог. Өөрийн хүүхэд, өөрийн мориос илүү хөлсөөр хүүхэд ажиллуулах явдал нийтлэг байна. 2024 онд 11 мянга гаруй уралдаанч хүүхэд, хурдан морь бүртгэгдсэнээс 10 хувь нь л өөрийн морийг унасан байна. Бусад нь гэрээгээр болон эцэг эх, асран хамгаалагчтай тохиолцсон.
Үүнээс гадна 2000 хүүхэд цалин хөлс авсан эсэх нь тодорхойгүй. Энэ нь хөдөлмөрийн мөлжлөг явагдсан байж болзошгүйг илтгэж байгаа юм. Унаач хүүхдийн цалин 400 мянгаас 1.5 сая төгрөгийн хооронд байна.
400 мянга гэдэг хөдөлмөрийн хөлсний доод хэмжээнд ч хүрэхгүй дүн.
ХЭҮК-оос явуулсан судалгаанд оролцсон унаач хүүхдүүд морь унахаас гадна өглөө эрт босох, ахуйн ажилд туслах нь хүндрэлтэй байдгийг хэлсэн. Мөн уяач нь загнаж зандрах үед эргээд сургуульдаа явах хүсэл төрдөг гэж хариулсан.
Үндэсний баяр наадмын тухай хууль 2003 онд батлагдсанаас хойш уралдаанч хүүхэд бүр ослын даатгал хийлгэх шаардлага тавьдаг. Өнөөдрийн байдлаар даатгалын хураамж 100 мянган төгрөг, нөхөн төлбөрийн хэмжээ 20 сая төгрөг байна.
Сүүлийн гурван жилийн хугацаанд 21 аймаг, 9 дүүргээр авч үзвэл:
-
2022 онд 85 хүүхэд мориноос унаж бэртсэн. Нас барсан нэг тохиолдлыг Эрүүгийн хуулийн дагуу шийдвэрлэсэн.
-
2023 онд 149 хүүхэд унаж бэртсэний нэгийг нь Эрүүгийн хуулиар, нас барсан дөрвөн тохиолдлыг Эрүүгийн хуулиар шийдвэрлэсэн.
-
2024 онд 234 хүүхэд унаснаас долоог нь Эрүүгийн хуулийн дагуу шийдвэрлүүлсэн гэсэн мэдээлэл ирсэн гэв.
