Казахстан улсын гавъяат жүжигчин, дуучин Мадина Садуакасова, Укша Жамалбек хоёрын хамтарсан “Арман Елим-ой”/ Мөрөөдлийн улс / уран бүтээлийн тоглолт энэ сарын 16-нд “UB palace”-д болно. Энэхүү тоглолт мөн Ховд, Баян-Өлгий аймагт тоглогдоно. Тоглолтыг “Баяр интертайнмент” компаниас зохион байгуулж байгаа бөгөөд тус компани өнгөрсөн 2017 онд Казак ард түмний үндэсний баяр болох Наурызын баярт зориулан Казакстан улсын дуучин Терегали Терегали-гийн “Улы дала баласы” тоглолтыг Монгол Улсад зохион байгуулж байсан аж.
Казахстан улсын гавъяат жүжигчин, дуучин Мадина Садуакасоватай ярилцлаа.
-Монгол Улсад уран бүтээлийн тоглолтоо хийхээр ирсэн сэтгэгдэл ямар байна. Энэ талаар яриагаа эхэлье?
-Монгол Улсад арван жилийн өмнө ирж байсан. Тэр үедээ Наурызын тоглолтын зочны хувиар ирж ая дуугаа өргөж байсан. Харин одоо уран бүтээлийн тоглолтоо хийхээр хүрэлцэн ирлээ. Маш их баяртай байна.
-Таны тоглолт Наурызын баярт зориулагдаж байгаа. Энэ тоглолтон дээрээ монгол уран бүтээлээс дуулах уу?
– Арман Елим-ой”/ Мөрөөдлийн улс / уран бүтээлийн тоглолт Наурызын баярт зориулагдаж байгаа хэдий ч энэ уран бүтээлээ Монголын нийт үзэгч түмэндээ зориулж байна. МУГЖ, дуучин Д.Энхзулын “Хүний сайхан сэтгэл” дууг монголоор дуулна. Мөн өөрийн шинэ уран бүтээлүүдээс өргөнө барина. Одоогоос 28 жилийн өмнө Баян-Өлгий аймгийн Булган сумаас Казахстан руу нүүж очсон, Казахстаны мундаг хөгжмийн зохиолчдын нэг болсон Заханы Ясира эгчийнхээ төрсөн нутагтаа зориулж гаргасан “Булганым” дууг бас дуулна.
-Та эстрадын дуучин хүн. Яагаад “Хүний сайхан сэтгэл” дуу сонгож дуулахаар болов?
-Уран бүтээл оюуны өмчтэй холбоотой асуудал байдаг учраас зохион байгуулагчдын зүгээс хэдэн уран бүтээлийг санал болгосон. Харин “Хүний сайхан сэтгэл “ дууны утга, мөн аялгуу маш сайхан санагдсан учраас сонгосон байгаа. Энэ дууг маш гоё дуулна гэж бодож байна. Маш сайн бэлдэж байгаа.
-Монгол уран бүтээлчдээс хэний дууг сонсох дуртай вэ?
-Монголын уран бүтээлчдээс МУГЖ Ариунаа, МУГЖ Б. Сарантуяа, Төрийн соёрхолт дуучин Д.Болд нарын уран бүтээлийг сонсох дуртай. Монгол оронд ирэхээс өмнө Монголын балетын урлаг маш сайн хөгжиж дэлхийн хэмжээнд хүрч байгаа гэдгийг сонсоод их баярлаж байсан. Энэ мэт Монгол улсаас сурч мэдэх зүйл зөндөө байгаа.
-Ер нь орон орны үзэгчид их ялгаатай байдаг. Та өмнө нь манай улсад ирж байсан дуучны хувьд Монгол болон Казахстаны үзэгчдийн хувьд ялгаа байна уу?
-Энд ирэхээс өмнө Монголын үзэгчдийг идэвхгүй байдаг гэж сонссож байсан л даа. Арван жилийн өмнө Монголд ирж Наурызын тоглолтод оролцож байхдаа хоёр дуу дуулж байсан. Тухайн үед үзэгчид маш халуун дотноор угтаж аваад ардын дуу дуулаач гэсэн хүсэлтийг илэрхийлж байсан. Тэр үед би дуучин хүний хувьд хэдэн жилийн дараа Монголд ирж өөрийн тайлан тоглолтоо хийж, нэг сайхан монгол дуугаар үзэгчдэд бэлэг барина гэсэн бяцхан мөрөөдөл тээж өөрийнхөө улсыг зорьж байв. Өнөөдөр ч гэсэн биднийг онгоцны буудал дээрээс маш халуун дотноор угтан хүлээж авлаа.
-Ушкын Жамалбек та хоёр Казастанд хамтарсан уран бүтээлийн тоглолтоо хийж байсан уу?
-“Баяр интертайнмент”-аас Монголд ирээд өөрийн тайлан тоглолт хийгээч гэсэн урилгыг хүлээж аваад маш их баярласан. Тиймээс тоглолтынхоо бэлтгэлийг маш сайн хангаж ирсэн гэж хэлж болно. Дуучин Ушкын Жамалбек бид хоёрын хувьд өмнө хамтарсан уран бүтээлийн тоглолт хийж байсан удаагүй. Монголд анх удаа хамтарсан тоглолтоо хийх гэж байна. Ушкын Жамалбекийн хувьд маш сайн дуулдаг, хоолойны цар хүрээ ихтэй, диапозон сайтай дуучин. Мөн Казакын ардын язгуур урлаг болон бусад төрөл жанраар дуулдаг залуу дуучин байгаа. Миний хувьд ийм мундаг залуу дуучинтай хамтарч тоглолтоо хийх гэж байгаадаа маш их баяртай байна.
-Тоглолтоо хийгээд шууд Казакстан руу буцах уу. Эсвэл Монгол оронтой танилцах төлөвлөгөөтэй байна уу?
-Энэ удаа Монголд нийт таван удаа тоглолтоо хийнэ. Ховд, Баян-Өлгий аймагт тус бүр хоёр тоглолттой. Харин Улаанбаатар хотын үзэгч түмэндээ нэг удаагийн тоглолтоо хүргэнэ. Тоглолтын хуваарь их шахуу байгаа. Хэрэв шахуу биш байсан бол хөгжмийн зохиолч Ясира эгчийнхээ төрсөн нутаг болох Баян-Өлгий аймгийн Булган суманд очиж үзмээр л байсан. Даан ч энэ удаа очиж амжихгүй юм байна. Өнөөдөр Цонжин болдог дахь Чингис хааны хөшөөт цогцолбортой очиж танилцана. Сэтгэгдэл маш өндөр байна.
-Таны уран бүтээлийн ажилд амжилт хүсье.
