Засгийн газар өчигдөр ээлжит бус хуралдаанаараа Монгол Улсаас зарим улсад суух Элчин сайд нарыг томилох асуудлыг хэлэлцлээ. Энэ удаагийн хуралдаанаар өмнө нь Ерөнхийлөгчийн зүгээс эсэргүүцэж байсан Япон Улсад суух Элчин сайдад нэр дэвшсэн Г.Тэнгэр болон Канад улсад суух Элчин сайд Н.Чимгүүндарь нарыг өөр улсад Элчин сайдаар томилох саналаа Засгийн газар оруулжээ. Тодруулбал Гончигзэвэгийн Тэнгэрийг Австралийн Холбооны Улсад суух Онц бөгөөд Бүрэн эрхт Элчин сайдаар, Наваан-Юндэнгийн Чимгүүндарийг Тайландын Вант Улсад суух Онц бөгөөд Бүрэн эрхт Элчин сайдаар тус тус томилуулах асуудлыг хэлэлцэн дэмжиж, энэ тухай саналыг Монгол Улсын Ерөнхийлөгчид өргөн мэдүүлэхээр тогтжээ. Гэхдээ тэднийг томилох эсэхийг мөн л хууль журмын дагуу Ерөнхийлөгчтэй зөвшилцөн, УИХ-д өргөн мэдүүлэх бөгөөд харин Ерөнхийлөгчийн зүгээс саяын нэр дурдагдсан Элчин сайд нарыг томилохыг дэмжих эсэх нь ихээхэн эргэлзээтэй байгаа нь олны анхаарлыг маш их татаж байна. Учир нь тэднийг өмнө нь Элчин сайдаар томилохоор Ерөнхийлөгчтэй зөвшилцөхөөр санал хүргүүлсэн боловч Ерөнхийлөгч Х.Баттулга Г.Тэнгэр, Н.Чимгүүндарь нарыг томилохгүй, өөр хүмүүс оруулж ирэхийг үүрэг болгосон бөгөөд тэднийг дипломат албыг хаших насны шалгуурыг хангаагүй, мөн тэднийг томилохдоо төрийн албаны мерит зарчмыг зөрчсөн гэсэн үндэслэлээр тус тус татгалзаад байсан билээ.
Эндээс хамгийн их анхаарал татаж байгаа нь Н.Чимгүүндарь гэх эмэгтэй юм. Түүний талаархи мэдээлэл төдийлөн их биш ч, УИХ-ын гишүүнээр Сэлэнгэ аймгаас өрсөлдөж ялалт байгуулсан, хотын төвд сүндэрлэх “Блю Мон” хэмээх тэнгэр баганадсан барилгын эзэн, УИХ-ын гишүүн Н.Оюундарийн дүү гэх мэдээлэл байгаа юм. УИХ-ын гишүүн Н.Оюундарь нь Н.Чингүүндарь, Н.Билгүүндарь, Н.Урианхай гэсэн гурван дүүтэй ба тэд бүгдээрээ барууны улс орнуудад өндөр боловсрол эзэмшцгээсэн юм байна. Харин энд нэр нь дурдагдаж буй Тайландын вант улсад суух Элчин сайдад яригдаж буй Н.Чимгүүндарь нь 2016 онд Засгийн газар байгуулагдсаны дараа Ерөнхий сайд асан Ж.Эрдэнэбатын зөвлөхөөр ажиллаж байсан нэгэн бөгөөд мөн 2008-2012 онд МАН-ыг Засгийн эрх барьж байх үед Парис хотноо консулаар томилогдон ажиллаж байсан юм байна. Түүний талаар өмнө нь “Цэцэг ичээм Элчин сайд” гэсэн инээд хүрмээр нийтлэл гарч байсан бөгөөд харин энэ удаа тэрээр гандан буурахгүй дахиад л Элчин сайдын албан тушаалд зүтгэж яваа бололтой.
Мөн МАН-ын буянаар Гадаад харилцааны дэд сайдаар ажиллаж байсан Г.Тэнгэр гэдэг нөхөр ч арын хаалганы буюу “шахааны хүн” гэдэг нь худлаа биш бөгөөд түүнийг өдгөө цагдан хоригдож байгаа Ерөнхий сайд асан С.Баярын хүн гэж ярьдаг юм байна.
Эндээс дүгнэлт хийгээд үзэхэд өнөөдөр Монгол улсад дипломат албанд ажиллах, тэр тусмаа элчин сайдаар томилогдоно гэдэг зүгээр нэг нутаг ус, эгч дүүгийн нөмөр нөөлгөөр болдог болсон нь энүүхний жишээгээр харагдаж байгаа нь хэнд ч ойлгомжтой болж байна. Уул нь Монголын төрд төрийн үнэлэмж гэж байх ёстой юу гэвэл ёстой. Тэр тусмаа Элчин сайдын шалгуур өндөр байх учиртай юу гэвэл учиртай. Харамсалтай нь төрийн алба нь төрлийн алба болсон шигээ дипломат алба ч мөн адил ах дүү хамаатан саднаа томилдог арын хаалганы алба болсон нь эцэс сүүлдээ ийм байдалд хүргэсэн бололтой. Энэ үүднээс нь эргэн сануулхад эрхэм Ерөнхий сайд аа та Элчин сайдаар томилогдох наад хүмүүсээ эргээд нэг харж бодож тунгаагаачээ гэж хэлмээр байна.
