Г.Шийлэгдамбын олон нийтэд хүргэх ил захидал ноцтой баримтууд дэлгэлээ

 

Өнгөрөгч 2015 оны 11 дүгээр сарын 4-ны орой албан өрөөндөө 500 сая төгрөгний хахууль авч байгаад үйлдэлдээ баригдсан хэмээн хоёр сар орчим хугацаанд саатуулагдсан Эрүүл мэнд, спортын яамны сайд, МАХН-ын Ерөнхий нарийн бичгийн дарга Г.Шийлэгдамбыг оны өмнөхөн буюу 12 дугаар сарын 31-ны өдөр батлан даалтад гаргасан юм. Тэрбээр баривчлагдсаныхаа дараа буюу 11 дүгээр сарын 5-ны өдөр Ерөнхий сайд Ч.Сайханбилэгт хаягласан захидалдаа Эрүүл мэнд, спортын яамны сайдын албан тушаалаас чөлөөлж өгөхийг хүссэн байдаг. Тэгвэл тэрбээр энэхүү хүсэлтийг өөрөө гаргаагүй болон түүнийг албан өрөөнөөс нь 500 сая төгрөгийн асуудлаар баривчлуулсан хэмээгддэг Н.Энхбаярын талаар ноцтой баримтууд дэлгэлээ. Нөгөө талаас Г.Шийлэгдамбыг Эрүүл мэнд, спортын яамны сайдын албан тушаалаас ангижируулсны дараа Шадар сайд Ц.Оюунбаатарт Эрүүл мэнд, спортын сайдын суудлыг өгч, МАХН-ын дарга Н.Энхбаяр өөрөө Ц.Оюунбаатарын Шадар сайдын суудлыг авахаар зүтгэж эхэлсэн юм. Ямартай ч, Н.Энхбаяр, Г.Шийлэгдамбын хооронд үүссэн үл ойлголцол ийнхүү үргэлжилж эхэллээ. Учир нь, Ерөнхий сайд Ч.Сайханбилэг албан тушаалаасаа огцрохгүйн тулд МАХН-ын дарга Н.Энхбаярын дэмжлэгийг авсан бөгөөд үүний хариуд түүнийг Шадар сайд болохыг зөвшөөрсөн юм. Ингээд Г.Шийлэгдамбын ил захидлыг хүргэе.

 

 

 

Олон нийтэд хүргэх ил захидал

 

 

Миний бие өмнө нь олон нийтэд хүрсэн ташаа мэдээлэлтэй холбогдуулан доорхи бодит үнэнийг хүргэж байна.  Үүнд:

Миний зүгээс Монгол Улсын Ерөнхий сайдад  хаягласан 2015.11.05 өдрийн
ЭМС-ын сайдаас өөрийн хүсэлтээр чөлөөлөгдөх өргөдлийг өөрийн хүсэл
эрмэлзлэлээр гаргаагүй бөгөөд Шадар сайд Ц.Оюунбаатарын тавьж байсан
шаардлагын дагуу зориуд бичигдэн бэлтгэгдэж ирсэн бланкан дээр гарын
үсэг зурахдаа утга агуулгыг нь ухаж ойлгох хугацаа байгаагүйн улмаас
холбогдох мөнгийг хувийн хэрэгцээндээ зориулж зээлсэн тухай
дурьдагдсаныг анзаараагүй юм.

Чухам бодит байдал дээр юу болсон тухай  дурьдвал холбогдох мөнгийг
авсан шалтгаан нь өөрийн албан тушаалын байдлаа ашиглаж, нөлөө үзүүлэх
замаар тодорхой компани, аж ахуйн нэгжтэй хийсэн тохиролцооны үүднээс
авилгалын сэдлээр хийгдсэн үйлдэл биш юм. Харин МАХН-ын дарга
Н.Энхбаярын намын санхүүжилт төвлөрүүлэх тухай шаардсан тулгалтаас
шалтгаалж   өөрийн сайн танил болох О.Даваасүрэнгээс дэмжлэг хүсэж
байсан хувийн гуйлтаас үүдэлтэй мөнгө байсан юм.  Энэ байдлыг ч тухайн
үед уулзсан уулзалтуудад О.Даваасүрэнд дуулгаж байсан болно.

Миний  бие иргэн О.Даваасүрэнгээс дэмжлэг хүсэж авсан мөнгөний 50 000
$-ыг 2015.11.4-ний өдрийн өглөө Н.Энхбаярт МАХН-ын төв байран дахь
өрөөнд нь оруулж өгсөн болно. Харин уг өдрийн орой ЭМС-ын Яамны байранд
О.Даваасүрэнгийн авчирч өгсөн 120 000 $-ыг мөн намын санхүүжилт болгон
МАХН-ын дарга Н.Энхбаярт өгөхөөр тохиролцсон байсан боловч тус өдөртөө
АТГ-ын албаны хүмүүст баривчлагдсан юм. Эцэст нь уг асуудал шүүхээр
эцэслэн тогтоогдоогүй байхад журмын зарим нөхөд маань бодит үнэнийг илт
гуйвуулан ташаа мэдээлэл тарааж байгаад харамсаж байна.    

             
                                         

                                             МАХН-ын Ерөнхий нарийн бичгийн

                                           Дарга Г.Шийлэгдамба /Гарын үсэг нь/

                                                                2016-01-28