УИХ-ын гишүүн, УИХ дахь Авлигын эсрэг лобби бүлгийн ахлагч Л.Оюун-Эрдэнэ өнөөдөр Авлигатай тэмцэх газраас дуудсаны дагуу 15.00 цагт очиж мэдүүлэг өглөө. Ж.Батзандан нарын УИХ-ын гишүүд өнгөрсөн өвөл Г.Хурцын асуудлаар нээлттэй сонсгол хийсэн бөгөөд тухайн үед Л.Оюун-Эрдэнэ гишүүн Б.Хурцын эсрэг байр суурь илэрхийлсэнтэй холбоотой АТГ-аас түүнийг ийнхүү дууджээ.
Тэрээр, Стандарт банктай холбоотой асудлыг АТГ шалгаад удлаа. Яагаад энэ асуудлыг одоо хүртэл түдгэлзүүлээд яваад байгаа юм бэ гэдгийг асуулаа. Эрдэнэтийн 49 хувийн дуулиантай холбоотой асуудал УИХ-ын шийдвэр гараад байхад мартагдах шатандаа орлоо. Энэ асуудал авлигатай холбоотой эсэхэд яагаад одоо хүртэл тайлбар өгөхгүй байгааг асуулаа. Дуулиант 60 тэрбумын хэрэг юу болсныг асуулаа. Өнөөдөр би нэг зүйлийг хэлье гэж бодож байна. Монголын нийгэмд нэг хэсэг дуулиан гараад мартагддаг боллоо. 60 тэрбумын хэрэг гэх маш бодитой бичлэгтэй хэргийг АТГ шалгасан. Хэрэв энэ хэргийн нэг бүрэлдэхүүн хэсэг нь АТГ өөрөө биш бол одоо энэ хэргийг шалгаж, цэг тавиач ээ гэж тэрээр хэллээ.
“Хэрвээ би сонгогдвол 60 тэрбумын хэргийг илрүүлнэ” гэж хэлсэн Монгол Улсын Ерөнхийлөгч одоо хаана явна вэ? “Амиа алдахаас ч айхгүйгээр шударга ёсны дуу хоолой болно” гэж мэдэгдэж байсан Ерөнхий сайд одоо хаана явна вэ? “Хэрэв би Хууль зүйн сайд болбол шударга хуулийн хайчийг ажиллуулна” гэж мэдэгдэж байсан Хууль зүйн сайд гэх мэт хүмүүс одоо хаана явна вэ? Яагаад ийм дуулиант хэрэг шийдэгдэхгүй хэр нь УИХ-ын гишүүдийн зохион байгуулсан нээлттэй сонсголын араас хөөцөлддөг хууль хяналтын байгууллагатай болчихов оо?
Хувь хүний хувьд энэ асуудал дээр үнэхээр тэвчээр алдагдаж байна. Төрийн ордонд зөндөө хашгирлаа, болдоггүй юм байна. Хаврын чуулганаас өмнө энэ асуудлыг шийдэхгүй бол олон нийтийн дунд орж, нийт иргэд, ТББ-уудтай нэгдэж, орон даяар шударга ёсны тэмцлийг эхлүүлнэ гэдгээ албан ёсоор мэдэгдэж байна. Дэлхийн улс орнууд асуудлыг өөрөөр хардаг боллоо. 60 тэрбумын хэрэгт холбогдсон УИХ-ын дарга М.Энхболд УИХ-ыг удирдах ёсз үйн эрхгүй гэж бодож байна. Тийм учраас сайн дураараа УИХ-ын гишүүн, УИХ-ын даргын бүрэн эрхээсээ түдгэлзэж, АТГ, Прокурорын нэгдсэн дүгнэлт гарсны дараа УИХ-ыг удирдах эрхтэй. Тэр болтол би УИХ-ын нэгдсэн чуулганд суухгүй гэдгээ мэдэгдэж байна гэлээ.
