Сонгуулийн насны 2.004 сая иргэн бүртгэгджээ

 

 

Сонгуулийн Ерөнхий Хороо, Үндэсний Аудитын Газар, Бүртгэл, Статистикийн Ерөнхий Газар хамтарч сонгуулийн цаг үеийн асуудлаар мэдээлэл хийлээ.

\”Сонгуулийн бэлтгэл ажлын хүрээнд нам, эвслээс сонгуульд зарцуулах зардлын дээд хэмжээг тогтоох, сонгуулийн хэсэг байгуулах ажил хийгддэг. Энэ ажлуудыг танилцуулахаар өнөөдөр /2016.03.02/ мэдээлэл хийж байна\” хэмээн Сонгуулийн ерөнхий хорооны ажлын албаны дарга Д.Баяндүүрэн хэллээ.

Нам, эвслээс сонгуульд зарцуулах зардлын дээд хэмжээг ҮАГ-ын даргын тушаалаар тогтоодог бөгөөд тус газраас хоёрдугаар сарын 29-ний өдөр зардлын тухай мэдээллийг өөрийн вэб сайт дээрээ байршуулсан билээ.

Энэ талаар ҮАГ-ын дэд дарга, тэргүүлэх аудитор Б.Баттуяа \”Сонгуулийн тухай хуульд заасны дагуу нам эвслийн сонгуульд зарцуулах зардлын дээд хэмжээ, нэр дэвшигчийн тойрогт зарцуулах зардлын хэмжээг тус тус тогтоосон байгаа. 

Мөн орон нутгийн сонгуульд зарцуулах зардлын дээд хэмжээг сонгуулиас 90 хоногийн өмнө тогтоох ёстой байдгийг үндэслэн орон нутгийн сонгуульд зарцуулах зардлын дээд хэмжээг тогтоохоор ажиллаж байна\” гэсэн мэдээллийг өгөөд сэтгүүлчдийн асуултад хариуллаа.

– 2012 онд нам, эвслээс сонгуульд зарцуулах зардлын дээд хэмжээ есөн тэрбум төгрөг байсан. Энэ удаагийн сонгуульд зарцуулах зардлын хэмжээ яагаад ингэж буурах болов?

– Сонгуулийн шинэ хууль гарсантай холбогдуулан сурталчилгааны хоног 45-18 болж буурсанбайгаа. Мөн телевизийн эфирээр гарах сурталчилгааны цагийг зааж өгч, өдөрт 60 минутаас илүү хугацаагаар сурталчилгаа хийхийг хориглосон. Эдгээр болон бусад шалтгаануудаар зардлын дээд хэмжээ буурсан.

– Зардлын дээд хэмжээг хэтрүүлсэн тохиолдолд ямар хариуцлага тооцох вэ?

– Сонгуулийн зардал, зарцуулалтын хэмжээнд ҮАГ хяналт тавьж ажилладаг. Сонгуулийн дараа нам, эвсэл, нэр дэвшигч нар зардлын тайлангаа гаргаж СЕХ-нд өгөөд, СЕХ-оос манайд тайланг ирүүлдэг. ҮАГ газар тус тайланд 90 хоногийн дотор аудит хийж баталгаажуулдаг.

Зардлын дээд хэмжээг давсан тохиолдолд хөдөлмөрийн хөлсний доод хэмжээг 20-26 дахин нэмэгдүүлсэнтэй тэнцэх хэмжээний торгууль ногдуулах хуулийн заалттай.

Дараа нь БСЕГ-ын дэд дарга Ц.Пүрэвдорж сонгуулийн бэлтгэл ажлын хүрээнд хийж байгаа ажлаа танилцууллаа.

Тэрбээр \”БСЕГ-ын хувьд сонгогчийн нэрийн жагсаалтыг гаргах үүрэгтэй. Үүний дагуу гуравдугаар сарын 1-ний байдлаар сонгогчийн нэрийн жагсаалтыг гаргаж цахим хуудастаа нийтлээд байна. 

Сонгогч та burtgel.mn цахим хуудас руу ороод өөрийн регистерийн дугаараар хайж, өөрийн мэдээллээ шалгах боломжтой. Сонгогчийн мэдээлэлд нэр, эцгийн нэр, ургийн овог, нас, хүйс, хаяг,  тойрог, хэсгийн хороо гэх мэт мэдээллүүд багтсан байгаа. Иргэд маань тухайн мэдээлэлтэй танилцаад зөрүү зүйл байвал БСЕГ-т хандаад зөрчлөө арилгуулах боломжтой\” гэлээ.

Одоогийн байдлаар хэчнээн сонгогч бүртгэгдээд байгаа талаар тодорхой мэдээллийг БСЕГ-ын Бүртгэлийн газрын дарга Д.Энхцэцэг өгсөн юм.

\”Хоёрдугаар сарын 1-ний байдлаар 2,004,048 сонгуулийн насны иргэн бүртгэгдээд байна. Эдгээр иргэд бүгдээрээ сонгуульд оролцоно гэж ойлгож болохгүй. 2,004,048 сонгуулийн насны иргэнээс гадаадад байгаа, хорих ял эдэлж байгаа болон эрх зүйн чадамжгүй иргэд хасагдана\” гэсэн юм.