Нийслэлд хамгийн их тулгамдаж байгаа асуудлын нэг бол яах ч аргагүй автомашины зогсоол. Үүнээс болж хэчнээн хэмжээний мөнгө эгэл ардын халааснаас хувь, хувьсгалын дансанд орж байгааг таашгүй. Зогсоолоо шийдээгүй байж торгохоо урьтал болголоо гэсэн төрийн шийдвэрийг чиглэх олны бухимдлыг дарах аргыг одоо болтол олж чадахгүй л байгаа бололтой. Энэ байдал үргэлжилсээр.
Гэтэл дарин дээр давс гэгчээр бас нэгэн шийдвэр анхаарал татаж эхэллээ. Нийслэлийн Засаг даргын 2018 оны “Хот тохижилтын талаар авах зарим арга хэмжээний тухай” А/777 дугаар захирамжийн хэрэгжилтийг хангах зорилгоор бас нэгэн тушаал асуудал дагуулахаар зэхэгдэх нь тэр. Учир нь Сүхбаатар дүүргийн 1 дүгээр хороо, Улсын драмын эрдмийн театрын хойд талбай, мөн дүүргийн 08 дугаар хороо, “Бльюмон” үйлчилгээний төвийн зүүн талд байрлах талбайг орчин үеийн архитектур төлөвлөлтийн шийдлийн дагуу тохижуулж, иргэдэд амарч зугаалах орчинг бүрдүүлж өгөх Ажлын хэсгийг Улаанбаатар хотын Ерөнхий менежерийн А/222 дугаар тушаалаар байгуулж гэнэ. Ажлын хэсэг өчигдөр хуралдаж, Улаанбаатар хотын Ерөнхий менежер Т.Гантөмөр энэ хоёр газрын авто зогсоолыг зохих журмын дагуу хаахыг Нийслэлийн Авто замын хөгжлийн газарт үүрэгдсэн байна. Мөн тохижилтын ажлын төлөвлөлтийн шийдэл, даалгавар боловсруулахыг Нийслэлийн Хот төлөвлөлт ерөнхий төлөвлөгөөний газарт, газар эзэмшлийн байдалд судалгаа хийж, шаардлагатай арга хэмжээ авч ажиллахыг Нийслэлийн Газрын албанд тус тус үүрэг болгожээ.
Нийслэлийн хэмжээнд ногоон байгууламжийг нэмэгдүүлж, өндөр настан, хүүхэд залуус нарлаж, салхилж, тоглох газар хомс байна гэдэг ч төв зам дагуу, чимээ шуугианы дунд хэр тухтай санагдах бол гэсэн асуулт бас гарч ирнэ. Тэгээд ч оноосон байршлын ойролцоо бараг авто зогсоол байхгүй гэж болно. Тэгэхээр тэр орчмын байгууллагын ажилчид, тухайлбал, драмын театрын үзвэр үзэгчид явган ирэх шаардлагатай болох юм. Бльюмоны хувьд ч гэсэн МУИС, Өргөө-2 кинотеатр, ШУТИС, МУИС-ийн номын сан гээд олны хөл ихтэй газар авто зогсоол, амрах талбайн аль нь илүү чухал хэрэгцээтэй вэ гэдгийг түүгээр зорчигчид болон тэр орчимд ажиллаж, амьдарч буй иргэд илүүтэй сайн мэднэ.
Ер нь зогсоолын асуудал улам бүр багасч байгаагийн жишээ нь зөвшөөрөлтэй гэх 28 авто зогсоолоос бусад байршлуудад төлбөртэй зогсоол ажиллуулах байдал гаарсан. Мөн орон сууцны хорооллууд бүгд хаалттай болсон гээд дурьдвал асуудал их байна.
Тиймээс эхний ээлжинд дээр дурьдсан хоёр байршлын хүрээнд шийдвэр гаргаж ямар нэгэн тушаал, үүрэг өгөхөөсөө өмнө ард иргэдээс асууж, зөвлөлдсөн нь зөв алхам болох бус уу. Сүүлийн үед ам алдвал барьж болдогийн жишээ олширч байгаа. Тэгвэл энэ удаад дахин судалгаагүйгээр нийгэмд нийцэхгүй шийдвэр гаргахгүй байх тал дээр анхаарвал яасан юм бэ гэдгийг хотын удирдлагууддаа сануулах гэлээ.
