Ц.Ганзориг: Гэрээгээр ажиллах хүсэлтэй 10 мянга гаруй хүн шалгалтанд орно

$\"\"$

Бүгд найрамдах Солонгос улсад гэрээгээр ажиллах хүсэлтэй иргэдийн солонгос хэлний төвшин тогтоох шалгалт энэ сарын 14-15-нд болно. Үүнтэй холбогдуулан Хөдөлмөр эрхлэлтийн үйлчилгээ, судалгаа, мэдээллийн төвийн гадаадад ажиллах хүч, дадлагажигч илгээх хэлтсийн ахлах мэргэжилтэн Ц.Ганзоригоос зарим зүйлийг тодрууллаа.

Бүгд на найрамдах Солонгос улсад гэрээгээр ажиллах хүсэлтэй хэчнээн иргэн одоогоор бүртгүүлээд байна вэ. Тэднээс хэчнээн нь солонгос хэлний төвшин тоггоох шалгалтад орох вэ. Энэ талаар тодруулаач?

-Бүгд найрамдах Солонгос улсад ажиллах хүсэлтэй иргэдийг жил бүр бүртгэдэг. Үүнтэй холбогдуулан бүртгүүлсэн иргэдээс солонгос хэлний төвшин тогтоох шалгалт авдаг. Энэ жил 10 мянга гаруй хүн бүртгүүлсэн. Тэгэхээр шалгалтад 10 мянга гаруй хүн орно. Мөн энэ жилийн шалгалтын агуулгад өөрчлөлт ороогүй. Компьютерт суурилсан тестийн аргаар онлайнаар авна.

-Шалгалт энэ сарын 14-15-нд болно гэсэн. Бүртгүүлсэн хүмүүс шалгалтад ирэхдээ ямар бичиг баримттай ирэх ёстой вэ?

-Бүртгүүлэгчид шалгалт өгөхдөө шалгалтын тасалбар, иргэний үнэлэхтэйгээ ирэх хэрэгтэй. Шалгалтад орохын өмнө шалгалтын төв комиссын гишүүд болон хянагч нар шалгуулагчийн зургийг царайтай нь тулгалт хийдэг учраас иргэний үнэмлэхээ зайлшгүй авчрах ёстой. Мөн гадаад паспортоороо бүртгүүлсэн хүн байвал паспорт шаардлагатай болно. Ямар нэгэн бичиг баримтаа орхисон бол шалгалтад оруулахгүй.

-Шалгалтын хуваарийн талаар дэлгэрэнгүй мэдээлэл өгөхгүй юу?

-Бид шалгалтыг дөрвөн ээлжээр авахаар зохион байгуулсан. Нэг болон дөрөвдүгээр ээлжийн шалгалт өглөө 10 цагт эхэлнэ. Гэхдээ өглөө 08.30 цагт тогтсон газартаа ирж, хуваарийн дагуу суудлаа эзэлсэн байх шаардлагатай. Харин хоёр болон гуравдугаар ээлжийн хүмүүсийн шалгалт өдөр 14.00 цагт эхэлнэ. Мөн 12.30 цагт шалгалтын байрандаа ирж, суудлаа эзэлсэн байх хэрэгтэй. Шалгалтаас хоцорч ирсэн тохиолдолд оруулахгүй учраас тогтсон цагтаа ирэх шаардлагатай. Мөн нөхөж шалгалт авахгүй.Тиймээс хариуцлагатай байж, цагаа зөв төлөвлөн тогтсон цагтаа л ирэх хэрэгтэй юм. Бүртгүүлэгчдийн дугаараар шалгалтын байруудыг хуваарилсан.

Жишээлбэл, үйлдвэрлэл урлалын политехникийн колллеж, 96-р сургууль, хоёрдугаар сургууль, 44-р сургууль, 75-р сургууль, 12-р сургуулиудад хуваарийн дагуу шалгалтаа авна. Энэ талаархи дэлгэрэнгүй мэдээллийг www.hudulmur.mn сайтаас авч болно.

-Бүртгүүлсэн иргэд шалгалтад орохдоо юу анхаарах хэрэгтэй вэ. Энэ талаар мэдээлэл өгөхгүй юу?

-Иргэд шалгалтад орохдоо хэд хэдэн зүйлийг анхаарах хэрэгтэй. Нэгдүгээрт, өөрийн шалгалт өгөх газарт тогтсон цагтаа ирсэн байх. Зарим хүмүүс шалгалтын хуудсанд өөрийн овог нэрээ тулгахгүй явуулах тохиолдол гардаг. Тиймээс хариултын хуудсыг авангуутаа өөрийн овог нэр, бүртгэлийн дугаартай ижил эсэхийг тулгаж үзэх хэрэгтэй. Мөн нэг хүнд нэг л хариултын хуудас өгөх учраас маш нягт нямбай бөглөх хэрэгтэй. Хэрвээ буруу хариулаад шингэн болон туузан штрикээр зассан тохиолдолд буруу хариулсанд тооцно. Мөн гар утастай оруулахгүй гэдгийг анхаарах хэрэгтэй. Шалгалтыг хар өнгийн тосон балаар бөглөх ёстой байдаг. Энэ мэтчилэн зүйлсийг анхаарч, шалгалтдаа хоцрохгүй ирэх ёстой.

Н.Батзаяа

Монголын мэдээ