Өнгөрсөн долоон хоногт болсон онцлох үйл явдлыг тоймлон хүргэж байна.
Манай жүдочид ДАШТ-ээс гурван хүрэл медаль хүртлээ
Жүдо бөхийн дэлхийн аварга шалгаруулах тэмцээнээс манай тамирчид гурван хүрэл медаль хүртсэн. Тухайлбал, МУГТ Хөдөлмөриийн баатар Д.Сумьяа, ОУХМ Л. Отгонбаатар хүрэл медаль хүрсэн. Мөн +100 кг-ийн жинд ОУХМ Өлзийбаярын Дүүрэнбаяр хүрэл медаль хүртсэн юм. Ингээд Монголын баг тамирчид нийт гурван медальтайгаар ДАШТ-ийг өндөрлүүлж байна.
Монгол Улсын Ерөнхийлөгч Х.Баттулга Бүгд Найрамдах Азербайжан улсын Ерөнхийлөгч Илхам Алиевтэй уулзав
Бүгд Найрамдах Азербайжан улсад ажлын айлчлал хийж байгаа Монгол Улсын Ерөнхийлөгч Х.Баттулга өчигдөр тус улсын Ерөнхийлөгч Илхам Алиевтэй ганцаарчилсан болон өргөтгөсөн бүрэлдэхүүнтэй уулзалт хийлээ. Уулзалт Бүгд Найрамдах Азербайжан улсын Ерөнхийлөгчийн өргөө болох Зугульба ордонд ажил хэрэгч, найрсаг дотно уур амьсгалтай болов. Уулзалтын эхэнд Азербайжан улсын Ерөнхийлөгч Илхам Алиев Монгол Улсын Ерөнхийлөгч Х.Баттулгыг эх оронд нь тухлан саатахыг уриад, ажлын айлчлал хийж буйд нь талархал илэрхийлсэн юм.
Ганцаарчилсан уулзалтын үеэр Монгол Улсын Ерөнхийлөгч Х.Баттулга 1951 оны арванхоёрдугаар сарын 5-нд Бакугийн нефть боловсруулах үйлдвэрийг задалж Зүүнбаянд жижиг хэмжээний үйлдвэр байгуулж 1969 оныг хүртэл ажилласан, уг үйлдвэрт Азербайжан мэргэжилтнүүд очиж ажиллаж байсан хоёр орны харилцааны сонирхолтой түүх байдаг тухай дурсав. Энэ тухайд Бүгд Найрамдах Азербайжан улсын Ерөнхийлөгч Илхам Алиев сонирхон сонсож, энэ салбарын хамтын ажиллагааны туршлага байгаа учир цаашид хамтран ажиллах бүрэн боломжтой хэмээн онцоллоо.
Хоёр улсын Ерөнхийлөгч нар ганцаарчилсан уулзалтын үеэр Монгол Улсын нутаг дэвсгэрээр дамжиж, бусад орнуудын зах зээлд хамтран гарах, бүс нутгийн хөгжилд идэвхтэй оролцоотой байх болон Монгол Улсын бараа бүтээгдэхүүнийг дэлхийн зах зээлд гаргахад ложистикийн дэмжлэг үзүүлэх, энэ чиглэлд хамтран ажиллах боломжийг харилцан судлахаар тохиролцов.
Монгол Улсын Ерөнхийлөгч Х.Баттулга ОХУ-ын Ерөнхийлөгч В.В.Путинтай уулзлаа
үгд Найрамдах Азербайжан улсад ажлын айчлал хийж байгаа Монгол Улсын Ерөнхийлөгч Х.Баттулга өнөөдөр тус улсын Баку хотноо ОХУ-ын Ерөнхийлөгч В.В.Путинтай уулзлаа. Уулзалтаар хоёр улсын хамтын ажиллагааны талаар Ерөнхийлөгч нар санал солилцож, энэ сарын 11-13-нд ОХУ-ын Владивосток хотноо болсон Дорнын эдийн засгийн чуулганы үеэр уулзахдаа ярилцсан хоёр орны харилцаа хамтын ажиллагааг хөгжүүлэх болон эдийн засгийн харилцан ашигтай хамтын ажиллагааг дэмжих асуудлаар ярилцав.
Мөн Монгол Улсын Ерөнхийлөгч Х.Баттулга, Бүгд Найрамдах Азербайжан улсын Ерөнхийлөгч Илхам Алиев, ОХУ-ын Ерөнхийлөгч В.В.Путин нар хамтдаа Баку хотын “Үндэсний Гимнастика Арена” спортын ордонд болж байгаа Жүдо бөхийн Дэлхийн аварга шалгаруулах 32 дахь удаагийн багийн тэмцээний үдээс өмнөх барилдаануудыг үзэж сонирхлоо.
Р.Төмөрхуяг: Миний хүү Т.Гомбосүрэн миний удмыг залгах ганц хүү минь байсан
ЗТХЯ-нд гарсан хүн амины хэргийн хохирогч Т.Гомбосүрэнгийн ар гэрийнхэн болон өмгөөлөгч нь өнөөдөр мэдээлэл хийлээ. Тодруулбал, ЗТХЯ-ны Төрийн захиргааны удирдлагын газрын дарга Б.Махбал нь архи уусан үедээ согтуурч, хамтран ажиллаж байсан Хяналт шинжилгээ үнэлгээ дотоод аудитын газрын дарга Т.Гомбосүрэнгийн аминд хүрсэн. Тиймээс Б.Махбалд Эрүүгийн хуулийн тусгай ангийн 10.1-т зааснаар эрүүгийн хэрэг үүсгэн, ШШГЕГ-ын харьяа цагдан хорих 461 дүгээр ангид саатуулан шалгаж байгаа.
Талийгаачийн аав Р.Төмөрхуяг “Ийм хэрэг гарсанд маш их харамсч байгаа. Манай гэр бүлийн 4 дэх үе нь төрд зүтгэж байгаа ийм л гэр бүл байсан. Би хүчний болон төрийн байгууллагад 43 жил ажиллаад тэтгэвэртэээ гарсан. Төрийн албанд ийм харамсалтай юм болно гэж бодоогүй төрийн албанд зүтгүүлсэн. Миний хүү нийтэч, хамт олонч, эелдэг зөөлөн. Хүний арга эвийг олдог тийм л хүү байсан. Хүү маань нас бараад сэтгэл санааны хувьд таагүй, мөн монгол ёс заншлаа бодоод өнөөдрийг хүртэл дуугүй байлаа. Энэ хугацаанд миний хүүг архидан согтуурч байгаад амиа алдсан гээд янз бүрийн л мэдээлэл гарсан. Тиймээс энэ асуудалд одоо тайлбар өгөх нь зөв байх. Миний хүү тэгэж архи дарс уудаг хүн биш. Би ч хүүгээ тэгэж хүмүүжүүлээгүй. Сэлэнгийнхэн намайг мэднэ дээ. Би огт архи уудаггүй. Хүүгээ сургууль соёлтой маш сайн хүмүүжүүлсэн. Би хоёр охин, нэг хүүтэй. Миний хүү Т.Гомбосүрэн миний удмыг залгах ганц хүү минь байсан. Хүүгийн маань хамгийн бага хүү одоо ой 4 сартай. Ачийгаа том болоход би хүүгээ аав чинь ажил дээрээ архидан согтуурч байгаад амиа алдсан гэх үү, ажлаа хийж яваад архи уусан хүмүүсийн гарт амиа алдсан гэх үү. Тиймээс энэ асуудал болгоомжтой хандахыг анхааруулж байна” гэлээ.
Хакүхо М. Даваажаргал: Аав маань тэнгэрт дэвшсэн болохоор барилдахад амар байгаагүй ээ
Мэргэжлийн сүмогийн намрын башёд нэг ч уналгүй түрүүлж, хэд хэдэн түүхэн дээд амжилт тогтоосон ёкозүна Хакүхо Мөнхбатын Даваажаргалыг эх орондоо ирсэнтэй нь холбогдуулан УИХ-ын дарга М.Энхболд өнөөдөр хүлээн авч уулзлаа.
Тэрбээр энэ намрын тэмцээнд 41 дэх удаагаа түрүүлж, 1,000 давааны босгыг давж, ёкозүна цолтойгоор 800 даваа авч, 13 жил дараалан дор хаяж нэг башёд түрүүлсэн гээд мэргэжлийн сүмогийн шинэ 4 дээд амжилтын эзэн болсон билээ. Их аварга Мөнхбатын Даваажаргал “Аав маань тэнгэрт дэвшсэн болохоор барилдахад амар байгаагүй ээ. Гэхдээ хичээж зүтгэсний үр дүнд сайхан амжилт үзүүлсэндээ баяртай байна. Эх орондоо ирэхсэн гэж их яарсан. Аавынхаа үүсгэн байгуулсан “Их шавь” биеийн тамирын дээд сургуулийн “Их шавь” цогцолборын нээлтэд оролцоод буцна. Монголын Үндэсний Олимпийн Хорооноос намайг “Токио-2020” олимпийн наадамд оролцох Монголын багийн Элч төлөөлөгч (Olympic Ambassador)-өөр томилсон юм. Энэ чиглэлээр Японд хийх ажил их байгаа” гэв.
“Өгөөж чихэр боов” компанийн захирал С.Түмэнгэрэл залуу ажилчиддаа байр өгчээ
Хүнсний манлай үйлдвэр “Өгөөж чихэр боов” ХХК-ийн 1935 онд суурь нь тавигдаж байсан Монгол Улсын хүнсний ууган үйлдвэрүүдийн нэг. Тус компанийн ерөнхий захирлаар С.Түмэнгэрэл ажилладаг бөгөөд залуу боловсон хүчнээ их дэмжиж ажилладаг бөгөөд 14 залуу ажилчиндаа байр өгчээ. Энэхүү байрны түлхүүрийг өчигдөр буюу Намрын дунд сарын билгийн тооллын 17 өдөр ажилчиддаа гардуулан өгсөн байна.
Таван настай хүү өөрийнхөө хүсэлтээр цэцэрлэгт оржээ
Сүхбаатар дүүргийн 135-р цэцэрлэгийн үүдэнд нэгэн хүү хоёр өглөө дараалан хүүхэд хүлээж авах цагаар орж ирж суусан талаар мэдээлэл цахим орчинд тархаж байна. Тус цэцэрлэгийн эрхлэгч А.Анхмаа “Энэ сарын 25-нд таван настай хүүхэд манай цэцэрлэгийн үүдэнд ирж суугаад явахгүй байна гэж ажилтнууд маань хэлсэн. Яагаад суугаад байгааг нь лавлатал “Би цэцэрлэгт л явмаар байна” гээд явахгүй байна гэсэн. Тэгэхээр нь би очиж уулзаад ээж, аавыгаа дагуулаад ир гэтэл “аав, ээж загнана” гээд явахгүй байсан юм. Тиймээс цэцэрлэгийн ажилтнаа цуг явуулж ээжийг нь ирүүлсэн. Ээж нь ойролцоох байрны СӨХ-д ажилладаг гэсэн. Ингээд ээжтэй нь уулзаж хүүхдийг нь цэцэрлэгтээ авъя, эрүүл мэндийн шинжилгээнд нь хамруулаад маргааш ирээрэй гэсэн юм.
Сангийн сайд Ч.Хүрэлбаатар 2019 оны төсвийн тухай хуулийн төслийг УИХ-ын дарга М.Энхболдод өргөн барив
Сангийн сайд Ч.Хүрэлбаатар өчигдөр 2019 оны төсвийн тухай хуулийн төслийг УИХ-ын дарга М.Энхболдод өргөн барьсан. Энэ талаар сэтгүүлчдэд мэдээлэл хийлээ. Тэрээр “2019 оны төсвийн орлогыг 9.7 их наяд, зарлага нь 11.6 их наяд, алдагдал 1.9 их наяд төгрөг байхаар тооцлоо.
Ирэх онд татварын багц хууль хэрэгжиж эхэлнэ. Ингэснээр татварын орчинд эерэг орчин үүснэ гэж харж байна. Тавантолгойн ордын нүүрсний тодорхой хэсгээс алга болсон, нүүрсний чанар буурсан асуудал гарсан. Тиймээс баялгийг хяналттай болгох зорилгоор тодорхой зардал тусгасан. Мөн шатахууны чанарын асуудал ихээр яригдаж байгаа учраас шинжилгээний рентген лаборатори байгуулахаар төсөвт суулгаж өглөө. Мөн гаалийн байгууллагын татварын нэмэгдлийг өсгөхөд анхаарна.
Төсвийн алдагдлын нийт 1.3 их наяд төгрөгийг гадны зээл тусламжаар, үлдсэн 600 тэрбумыг нь дотоодоос өр тавилгүйгээр нөхөхийг зорьж байна. “Ирээдүйн өв сан” 1.8 их наяд төгрөгийн өртэй байсан. Ирэх онд энэ өр бүрэн тэглэгдэж, 553 тэрбум орчим төгрөг хуримтлуулна. Энэ бол ирэх оны төсвийн гол онцлог болж байна. Ер нь “Ирээдүйн өв сан”-г цаашид хуримтлалтай болгох чиглэлд онцгой анхаарч, Монгол Улс анх удаа байгалийн баялгаасаа хуримтлал үүсгэж байгаа хэлбэр юм.
Төсвийн зардлыг тооцохдоо тэгш байдлаар санхүүжүүлэх аргачлал хэрэглэнэ. Нэлээд олон урсгал зардлыг өсгөхгүйгээр барина. Цалин тэтгэвэр, халамж нэмэх чиглэлд 720 тэрбум төгрөг суулгаж байна. Эрүүл мэндийн даатгалын салбарыг шинэчлэх замаар иргэдэд үзүүлэх энэ төрлийн үйлчилгээг сайжруулж, цахим тогтолцоонд шилжүүлнэ. Орон нутгийн хөгжлийн санд нэмж 189 тэрбум төгрөг суулгаснаар аймаг бүрт олгогдох санхүүжилт нэмэгдэж байна. Уул уурхайн лиценз олголтын 50 хувийг энэ санд төвлөрүүлэхээр тооцож байна. Гадаадын зээл тусламжийн хувьд, Төв цэвэрлэх байгууламж болон ундны усны хангамжийг нэмэгдүүлэх чиглэлд 750 сая ам.доллар байна. 2019 онд шинээр 40 сургууль, 60 цэцэрлэг, 22 дотуур байр, 32 эмнэлэг, 27 спорт заалыг шинээр өргөн барьж эхэлнэ” гэв.
