Мөрдөн байцаалтын явцад сэжигтэнг эрүүдэн шүүж, яргалан ял тулгаж байгаа дүрс бичлэгийг УИХ-ын гишүүд үзлээ. Үүний дараа зарим гишүүнээс сэтгүүлчид байр суурийг нь тодруулсан юм.
УИХ-ын гишүүн, Монгол Улсын Шадар сайд Ө.Энхтүвшин “Ер нь маш муухай л юм байна. Надад өөр хэлэх юм алга. Үгээр хэлэхийн аргагүй. Даралт ихтэй хүн үзэх хэрэггүй л юм байна”.
УИХ-ын гишүүн Оюунчимэг “Бачим, аймшигт үйлдлээс болоод Монгол улс хохирох ёсгүй гэж бодож байна. Хэвлэлийнхэн харин энэ бичлэгийг үзэх ёстой гэж бодож байна. Үнэний дуу хоолой, оюун санааг чиглүүлэгчид учир энэ бичлэгийг үзэж, дүгнэлтээ хийх ёстой. Бичлэгт үзүүлсэн дүрслэлийг би ярьж болохгүй байх. Гэхдээ үнэхээр байж боломгүй аргаар хүнийг яргалсан байсан. Би цааш нь үзэж чадалгүй дундаас нь хаяад гарсан” гэв.
УИХ-ын гишүүн, Хөдөлмөр Нийгмийн хамгааллын сайд С.Чинзориг “Засгийн газар мөрдөн байцаах явцад саад болохгүй байх нөхцөлтэйгээр 20 минут орчмын бичлэг үзүүлүүллээ. Үзээд Монголд ийм байдал байдаг юм байх даа гэж бодмоор, гайхмаар арай ч үгүй болов уу гэж сэтгэл шимширмээр байна.
Б.Содномдаржаагийн өрөөнд онц хүнд гэмт хэрэгтэн болон Амгаланбаатарыг хамт байлгаж, Б.Содномдаржааг шөнөжин унтуулахгүй тамлаж байгаа бичлэг байна. Т.Чимгээгийн өрөөнд ч Ц.Амгаланбаатарыг оруулж, дарамтлуулж буй бичлэгийг үзлээ.
УИХ-ын гишүүн Ж.Энхбаяр “Айхтар зүйл харлаа. Шудрага хууль ёсыг сахиулах ёстой хуулийн байгууллагууд хууль биелүүлэх ёстой байгууллагууд маань ийм зүйлд орооцолдсон байгаад санаа зовж байна. Хуулийн байгууллагын түүхэнд хар толбо болох юм болсон байна. Хүнийг яаж эрүүдэн шүүж, дарамталж, хүнийг яаж хэрэг хүлээлгэж байгаа байдлыг гишүүд бодитой, дүрс, дуутайтай харлаа”
УИХ-ын гишүүн Ц.Мөнх-Оргил “Ийм харгис хэрцгий эрүүдэн шүүлтийг зохион байгуулсан, хийсэн, хөхүүлэн дэмжсэн, зогсоож хянаж байх ёстой хүмүүст хуулийн дагуу хамгийн хатуу шийтгэл хүртээх ёстой. Энэ хэрэгт гүтгэгдэж, хэрцгий балмадаар эрүү шүүлтэн дор тулгагдаж хэрэг хүлээсэн хүмүүсийг яаралтай суллаж, ар гэрийнхэнтэй нь уулзуулж Монголын төр уучлалт гуйх ёстой.”
ЗГХЭГ-ын дарга Л.Оюун-Эрдэнэ “Хүнийг яргалах замаар хилсээр ял тулгасан байна. Нойргүй хонуулж, явган суулгаж, суниалгаж, өөр ялтныг оруулж, тэр дундаа эмэгтэй хүний тусгаарласан өрөөнд цээж нүцгэн эрэгтэй хүнийг оруулж, албаар ял тулгаж байгаа бичлэг байна.
Олон нийтэд шууд задлахыг бас бодолцох ёстой. Энэ нь хуулийн хяналтын байгууллагын нэр хүнд, төрд итгэх итгэлтэй холбоотой асуудал. Ард түмнээс нууж байгаа юм биш. Гэхдээ зайлшгүй шаардлага гарвал үзүүлэх боломжтой. Нууцаас гарсан бичлэг. Мөн Д.Булгантай холбоотой ч юм уу бичлэгүүд байгаа. Үүнийг прокуророос зөвшөөрөөгүй учраас үзүүлэх боломжгүй. Цаашдаа ийм зүйл битгий болоосой”
УИХ-ын гишүүн О.Баасанхүү “Тус бичлэгийг олон нийтэд үзүүлэхдээ эх хувилбарыг үзүүлж болохгүй. Харин жүжигчилсэн байдлаар үзүүлэх ёстой ” гэв.
Хүний эрхийн үндэсний комисс “Монгол Улс Эрүүдэн шүүхийн эсрэг Конвенцийн Нэмэлт Протоколд 2014 оны 12 дугаар сарын 11-ний өдөр нэгдэн орсноос хойш 5 жилийн хугацаа өнгөрсөн ч олон улсын гэрээний дагуу эрүү шүүлтээс урьдчилан сэргийлэх үндэсний механизмыг өнөөдрийг хүртэл байгуулаагүй байна. НҮБ-ын Хүний эрхийн Хороо 2017 оны 7 дугаар сарын 24-ний өдөр Монгол Улсын Засгийн газарт өгсөн зөвлөмждөө “…Цагдаагийн ерөнхий газрын Мөрдөн байцаах алба, Авлигатай тэмцэх газар эрүү шүүлт тулгасан хэргийг мөрдөн шалгахад бие даасан байдал хангалтгүй байгаад анхаарал хандуулахыг Хорооны зүгээс хүсч байна”, мөн “…Оролцогч улс нь эрүү шүүлт тулгасан үйлдлийн талаар мөн зүй бус харьцааны талаар гаргасан бүх гомдол, мэдээллийг шуурхай, үр дүнтэйгээр шийдвэрлэж байгаа эсэхийг нягтлах, ийм төрлийн хэрэг үйлдэгсдийг яллах, хэрэв шүүгдсэн тохиолдолд зохих ёсоор ял шийтгэгдсэн эсэх, хохирол нөхөн сэргээгдэх боломжтой эсэх, нөхөн төлбөр бүрэн авах боломжтой эсэхийг нягтлах ёстой” гэсэн байдаг. Түүнчлэн НҮБ-ын Хүний эрхийн зөвлөл Монгол Улс дахь Хүний эрхийн төлөв байдлын талаарх Үндэсний 2 дугаар илтгэлтэй холбогдуулан 12 зөвлөмжийг Монгол Улсын Засгийн газарт өгснийг дурдах хэрэгтэй” гэж мэдэгдлээ.
