Ойрын өдрүүдэд хамгийн их анхаарал татсан томилгоо бол АТГ-ын дарга болон дэд дарга нарыг томилох асуудал юм. Ерөнхийлөгч Х.Баттулга бүрэн эрхийнхээ хүрээнд АТГ-ын даргад З.Дашдавааг, дэд даргад Ж.Батсайхан нарын нэрийг дэвшүүлж, энэхүү саналаа УИХ-д зөвшилцөхөөр хүргүүлсэн билээ. Харин УИХ-ын гишүүн Ж.Батзандан, Т.Аюурсайхан, Л.Болд нарын нэр бүхий 19 гишүүн АТГ-ын удирдлагыг томилох асуудлаар сонсгол хийх хүсэлтийг гуравдугаар сард УИХ-ын даргад хүргүүлээд байсан юм.
Үүнтэй холбогдуулан УИХ-аас АТГ-ын удирдлагыг томилох эсэх асуудлаар сонсгол зохион байгууллаа. Энэхүү сонсголыг УИХ-ын гишүүн Т.Аюурсайхан удирдан явуулсан бөгөөд сонсголд оролцогч нийгмийн байгууллагын төлөөллүүд нэр дэвшигч нарт асуулт тавьж, хариулт авч байсан юм.
АТГ-ын даргад нэр дэвшигч З.Дашдаваа болон дэд даргад нэр дэвшигч Ж.Батсайхан нарын хариултуудаас онцлоё.
АТГ-ын даргад нэр дэвшигч З.Дашдаваа
– Би хуулийн байгууллагад 25 дахь жилдээ ажиллаж байна. Ямар нэгэн хоч байхгүй.
– АТГ-ын даргаар томилогдвол иргэдийн санал, гомдлыг хүлээн авах үнэгүй утас ажиллуулна. Мэдээж авлига, албан тушаалын хэргийг илрүүлэхэд тодорхой арга хэмжээг авч ажиллах болно.
– Авлигатай холбоотой аливаа хэргийг хуулийн хугацаанд нь шийдвэрлэх тал дээр зохион байгуулалттай арга хэмжээ авч ажиллана.
– АТГ-т авлига, албан тушаалын олон хэрэг шалгагдаж байна. Ерөнхий сайд асан Ч.Сайханбилэг, Сангийн сайд асан С.Баярцогт нарын нэр холбогдсон хэргийг хуулийн хүрээнд эцэслэнэ. Гэхдээ одоогийн байдлаар хэргийн материалтай танилцаагүй учир энэ тал дээр ямар нэгэн мэдээлэл өгөх боломжгүй байна.
– “Цэвэр агаар сан”-тай холбоотой авлигын хэргийн уршгаар Улаанбаатар хот утаатай үлдсэн. Одоогоор энэ гэмт хэргийн хор хохирлыг тооцох боломжгүй байгаа. Үүнийг тооцох боломжтой болгоно.
– Оффшортой холбоотой хэргүүдийг шийдэж болох байх. Түүнчлэн мөнгө угаах гэмт хэрэг, үндэслэлгүйгээр баяжсан нөхдүүдтэй тэмцэж болох эрх зүйн орчин байгаа гэж харж байна.
– -Тос, тосонбумбын хэрэгт анхаарч, шаардлагатай арга хэмжээг авч ажиллах болно.
– -Албан тушаалтнуудын ХОМ-ийг ил зарладаг. Цахимаар олон нийтэд ил болгодог болсон байна билээ. Энд анхаарч ажиллана.
АТГ-ын дэд даргад нэр дэвшигч Ж.Батсайхан
– Би шудрага бусын хонгил гэж мэдэхгүй. Би хонгилын нэг хэсэг нь биш.
– Зарим хэргийг хөөн хэлэлцэх хугацаа нь дуусан гэх үндэслэлээр дардаг. Энэ тал дээр анхаарч ажиллана. Ажилчидаа ч тэр тал дээр сургах бодолтой байна.
– Би нэг ч удаа эрүүдэн шүүх ажиллагаанд оорж байгаагүй. Энэ бол хүнд гэмт хэрэг. Би ямар нэгэн чиг үүргээр эрүүгийн хэрэг шалгаж байгаагүй.
– МАН-ын 60 тэрбумын гэмт хэрэгтэй холбоотой хяналт, шалгалтыг томилогдосон даруй хэмгийн эхэнд шалгах хэрэгтэй байх.
– Би УИХ-ын дарга асан М.Энхболдтой ганц ч удаа уулзаж байгаагүй. Гар барьж үзээгүй гэдгээ албан ёсоор хэлж байна.
– АТГ-ын дэд даргын суудал хүсч тэмүүлээд байх суудал биш.
– Аливаа шуугиан тарьсан хэргүүдэд улс төрийн нөлөөг тооцож, судлахгүйгээр шийдвэрлэдэг нь нэг талыг барилаа гэх хардлагад өртдөг. Нөгөө талаас, иргэдэд мэдээллийг хүртээмжтэй байдлыг хангаж ажиллах нь зүйтэй гэж болож байна.
– Хэрэв би хэн нэгэн улс төрд нөлөө бүхий эрхмийн гар хөл болж ажиллах байсан бол татгалзах эр зориг бий. Харин улс, эх орныхоо эрх ашиг, иргэдийн сайн сайхны төлөө энэ албанд зүтгээд үзэхийг хүсч байна.
