ЭМЯ-ны Шуурхай удирдлагын газрын дарга Д.Нарангэрэл “Өвчлөл гарснаас хойш анх удаа 1812 хүн эмчлэгдэн гарсан таатай мэдээ байна. Гэхдээ 24 цагийн хугацаанд хөлөг онгоцон дээр байсан хүмүүстэй холбоотойгоор Япон улсад өвчлөлийн тоо нэмэгдсэн. БНСУ-ын Дэгү хотод сүмийн цуглаанд явсан арван иргэн халдвар авсан зэрэг тохиолдол гарсан.
Тиймээс иргэддээ сар шинийн өдрүүдэд олон хүн цугласан газар, айлаар орохгүй байхыг онцгойлон зөвлөж байна. ДЭМБ-ээс аль болох даарахгүй байх дулаан хувцаслахыг зөвлөж байна. Хоёрдугаар халуун цай, шөл уух, жимс ногоо хэрэглэж, унтаж амрах, бухимдахгүй байхыг эрдэмтэн судлаачид хэлж байгааг анхаарах нь зүйтэй байна” гэлээ.
ДЭМБ-ын мэргэжилтэн О.Ариунтуяа “2020 оны хоёрдугаар сарын 20-ны байдлаар халдварын тохиолдол 75292 бүртгэгдэж, БНХАУ-аас гадна өөр улсуудад нийт 1900 тохиолдол бүртгэгдэн таван нас баралт тохиолдоод байна. БНХАУ улс сүүлийн дүн мэдээгээ ДЭМБ-д нэгтгэж ирүүлээгүй байна. Ойрын өдрүүдэд шинэ тохиолдлын тоо буурч байгаа ч энэ цаашид буурна гэж тооцоолоход эрт буюу тогтворгүй байна. Нийт бүртгэгдсэн тохиолдлын 2 хувь нь нас барж буй бөгөөд нас ахих тусам эрсдэл нэмэгдэж байна. Бага насны хүүхэд халдварлах нь цөөн байгаа бөгөөд үүний шалтгааныг тодруулах судалгаа хийгдэж байна. Халдварын голомт болж буй тохиолдлууд нь олон хүн цугласан газар байгаа учраас хүн амын хөдөлгөөн өвчлөлийг тархаах гол хүчин зүйл болж байна” гэв.
ХӨСҮТ-ийн Тандалт судалгааны албаны дарга А.Амбасэлмаа “Өнөөдрийн байдлаар нийт 170 гаруй сэжигтэй тохиолдлыг тусгаарлан шинжилгээ хийсэн, COVID-19 тохиолдол илрээгүй. Одоогийн байдлаар Замын-Үүдэд 103 хүн ажиглалтад, нэг хүн тусгаарлалтад, Гашуунсухайтад 12 хүн тусгаарласан. 2020 оны 2 сарын 19-нд Завхан аймагт нэг хүнийг тусгаарласан. Мөн Тианьжин хотод сурдаг оюутныг ХӨСҮТ-д тусгаарлан шинжилгээ авч байна. Замын-Үүдэд байгаа 103 хүнийг гурван зочид буудалд байрлуулан ажиглаж байна. Сэжигтэй тохиолдлыг 14 хоног тусгаарлана” гэв.
Мэргэжлийн 20 гаруй байгууллага хамтран хийсэн үнэлгээгээр хэрэв уг өвчин манай улсад орж ирвэл тархах өндөр эрсдэлтэй байна гэж үзжээ. Хэдийгээр БНХАУ-ын Ухань хотод байдал тогтворжиж байгаа хэдий ч дэлхий нийтэд тархах эрсдэл байгааг ДЭМБ анхааруулсан байна.
