УИХ-ын гишүүн асан Н.Батбаяр өөрийн охиноо улс төрд сойж, халаагаа өгөхөөр шийджээ. Улс төрд нөлөөтэй хүмүүс хүүдээ голдуу гишүүний суудлаа залгамжлуулж, улс төр дэх “нялх сэнгэм”-үүд гэх нэр эчнээ танил болтлоо хоногшжээ. Фортуна Н.Батбаярын охин Б.Жаргалан Архангай аймгаас нэр дэвшин Монголын улс төр дэх аавын “эрх охид”-ын жим гаргахаар чармайж байна.
Архангай аймагт АН-аас нэр дэвшихийн тулд Б.Жаргалан намдаа нэлээд хөрөнгө хаях нь лавтай. СЕХ-ны гаргасан тооцоогоор тус аймагт нэг нэр дэвшигч дээд тал нь 410 сая төгрөгийн зардал гаргах гэнэ. С.Эрдэнэ даргын гаргасан 100 сая схемээр авч үзбэл Б.Жаргалан Архангай аймагт дэвшихын тулд /10+20+20=50/ буюу эхний ээлжинд 10 хувь болох 41 сая төгрөг, дараагийн удаа 20 хувь болох 82 сая төгрөг, сүүлийнх нь 05 дугаар сарын 10 өмнө үлдэгдэл 20 хувийн 82 сая шилжүүлж нийтдээ 205 сая төгрөгийг тушаах ёстой. Энэ бол зөвхөн АН-аас нэр дэвших эрхээ баталгаажуулахын тулд өгч байгаа дэнчингийн мөнгө.
Цаана нь сонгуулийн үйл ажиллагаатай холбоотой бүх зардлыг нэр дэвшигч гаргана гэхээр сонгуульд өрсөлдөнө, тэр дундаа АН-аас квот авна гэдэг мөнгөтэй, нөлөөтэй, чинээтэй Б.Жаргалан шиг охидын барах даваа болж таарах нь. Фортуна Н.Батбаярын хувьд Эдийн засгийн хөгжлийн яамыг толгойлж, улсын хөрөнгө гарын салаагаар урсгасан гол буруутнаар нэрлэгддэг. Түүнийг улс төрийн хүрээнд эдийн засгийг хөгжүүлэх биш бүр хямрааж орхилоо гэж жагсаал цуглаан хүртэл хийж байлаа.
Парламентад гишүүнээр суухдаа онгод тэнгэртэй ярилцаж, 68 хувийн татварыг бий болгож, тооны бэлгэдлийн ухаанаар эдийн засгийг тайлбарлаж, иргэдийг “хөгжөөж” явсан түүх бий. Одоо охиноо ийнхүү улстөрд уралдуулж, ард нь дасгалжуулагч хийхээр шийджээ.
С.Өрлөг
