Истанбул-Улаанбаатар чиглэлийн тусгай үүргийн нислэгээр эх орондоо ирэх замдаа жирэмсэн эх амаржиж, онгоцонд ихэр охин төрүүлсэн билээ. Эх, хүүхдүүдийн бие сайн байгаа бөгөөд тэдний тусгаарлалтын хугацаа дууссанаар өнөөдөр ХӨСҮТ-өөс гарч байна. Онгоцонд мэндэлсэн охидод болон эхэд МИАТ ТӨХК-аас тус компанийн онгоцоор үнэ төлбөргүй нисэх эрх өгч, баярын мэнд хүргэлээ.
Тусгай нислэг Истанбулаас хөөрч, өндрөө авсны дараа жирэмсэн эх өвдөлт өгч эхэлсэн бөгөөд ОХУ-ын Сочи хотын дээгүүр нисч байх үед амаржиж охид төрсөн байна. Өмнө нь 1960-аад онд АН-24 онгоцонд жирэмсэн эх амаржиж байсан бол ихэр охид хоёр дахь тохиолдол болж бүртгэгдлээ. Онгоцонд эх баригч болон сувилагч явж байснаар тэднийг эсэн мэнд амаржуулж, мөн нислэгийг хэвийн үргэлжлүүлэн боломжийг бүрдүүлжээ.
Энэ ховор тохиолдлыг бэлэгшээн МИАТ ТӨХК-ийн захирал Д.Баттөр “Монгол Улсад дотоодын нислэгт өмнө нь хүүхэд төрж байсан. Олон улсын нислэгт анх удаа хүүхэд төрж байгаа тохиолдол юм. Мөн ихэр хүүхэд онгоцонд мэндэлж буй нь дэлхийд анхных болж байгаа. Долдугаар сарын 9-н нь МИАТ ТӨХК үүсгэн байгуулагдсаны яг дараагийн өдөр тохиосон юм. Биднийг их түгшээж бас баярлуулсан. Монголчууд бид охид төрвөл өсөн дэвжих нь хэмээн ихэд бэлгэшээдэг. Бид ч их бэлгэшээж байна. Тиймээс манай компаниас охидод болон ээжийг нь МИАТ ТӨХК-ийн нислэг үйлддэг бүх чиглэлд насан туршдаа үнэ төлбөргүй нисэх эрхийн бичгийг олгож байна” гэж сэтгэгдлээ илэрхийллээ.
Мөн энэ үеэр “Охидыг аль улсын харьяалал бүртгэх вэ” гэх сонирхолтой асуудал яригдсан бөгөөд Д.Баттөр захирал “Агаарын хөлгийн дотор тал Монгол Улсын нутаг дэвсгэрт хамаардаг. Харин хаана төрсөн бэ гэвэл онгоцонд л гэж хариулах байх. Энэ бол тун ховор тохиолдол шүү” гэж хариуллаа.
Охидод Энхцэлмэг, Энхжигүүр гэж нэр хайрласан гэж охидын ээж Д.Болортуяа мэдэгдлээ. Ховор тохиолоор мэндэлсэн ихрүүдэд аз жаргал, эрүүл энхийг хүсье.
