Энэхүү “гамшигт тоо толгойн уналт” удаашрах шинжгүй байгааг Дэлхийн Байгаль Хамгаалах Сангийн илтгэлд дурджээ.
Байгалийг хүмүүс урьд өмнө хэзээ ч байгаагүйгээр сүйтгэж байгааг анхааруулж байгаа бөгөөд бид ой мод шатааж, далай тэнгист хэт их загасчилж, зэрлэг ан амьтдыг сүйтгэж байгаа тул зэрлэг ан амьтад “уналтад ороод байна” гэж ДБХ-ны гүйцэтгэх захирал Таня Стил хэлэв.
“Бид өөрсдийнхөө гэр гэж нэрлэдэг цорын ганц газар болох дэлхийнгээ сүйтгэж байна. Дэлхийн эрүүл мэнд, аюулгүй байдал, оршин тогтнол эрсдэлд орж байна. Одоо байгаль биднээс цөхрөлтгүй тусламж хүсэж, цаг хугацаа дуусч байгааг анхааруулсаар байна.” гэжээ.
Тоонууд юуг илэрхийлж байна вэ?
Илтгэлд дэлхийн өнцөг булан бүрт амьдарч буй байгаль орчныг хамгаалах эрдэмтдийн судлаж байсан олон мянган зэрлэг ан амьтдын талаар авч үзсэн байна.
Тэд 1970 оноос хойш хөхтөн, шувуу, хоёр нутагтан, хэвлээр явагч, загасны тоо толгой дунджаар 68% унаж байгааг тэмдэглэжээ.
Энэхүү бууралт нь хүний үйл ажиллагаа байгалийн ертөнцөд хэрхэн хор хөнөөл учруулж байгаагийн тод нотолгоо гэж Лондонгийн Амьтан судлалын нийгэмлэгийн (ZSL) байгаль хамгаалах газрын дарга доктор Эндрю Терри хэллээ.
“Хэрэв юу ч өөрчлөгдөхгүй бол тоо толгой унах нь дамжиггүй бөгөөд зэрлэг ан амьтдыг устах аюулд хүргэж, бидний хамааралтай экосистемийн бүрэн бүтэн байдалд заналхийлэх болно” гэж тэр нэмж хэлэв.
Илтгэлд Ковид-19 цартахлын шинж чанар нь байгаль, хүн хоёр хэрхэн уялдаатай байгааг тодоор сануулж байна гэжээ.
Цар тахлын өвчин үүсэхэд хүргэдэг хүчин зүйлүүд, тухайлбал амьдрах орчны хомсдол, ан амьтдын ашиглалт, худалдаа зэрэг нь зэрлэг ан амьтдын тоо толгой буурахад нөлөөлж буй хүчин зүйлүүд юм.
