Хууль зүйн, дотоод хэргийн яамнаас “Зөрчлийн тухайн хуулийн шинэчилсэн найруулгын төсөл”-ийн анхны хэлэлцүүлэг боллоо.
2015 онд батлагдаж, 2017 оноос хэрэгжиж эхэлсэн Зөрчлийн тухай хууль нь бие даасан хууль гэхээсээ илүүтэй манай улсын нийгмийн амьдралыг бүхэлд нь зохицуулж буй 280 гаруй хуулийг зөрчсөн тохиолдолд хариуцлага хүлээлгэдэг хууль юм. Зургадугаар сарын 30-ны өдрийн байдлаар 5.2 сая зөрчил шийдсэн байгаа бөгөөд нийт зөрчлийн 96 хувь нь замын хөдөлгөөний дүрэмтэй холбоотой байжээ. Зөрчлийн тухай хуульд орох өөрчлөлтийг Хууль зүй, дотоод хэргийн сайд Х.Нямбаатар танилцууллаа.
Тэрээр “Зөрчлийн тухай хуулийг өөрчлөх шаардлагатай байгааг хоёр хүн тутмын нэг нь шаарддаж байна. Тиймээс дараах байдлаар өөрчлөлт оруулна.
1. Хулгай, дээрэм, хүн зодож гэмтээсэн, танхайрсан зэрэг жижиг гэмт хэргийг дахин Эрүүгийн хууль руу шилжүүлнэ. Ингэснээр гэмт хэргийн тоо маш их өснө. Цагдаагийн байгууллагад хоногт 200 гаруй зөрчлийн дуудлага бүртгэгддэг. Эдгээр дуудлага нь гэмт хэргийн тоонд бүртгэгдэж эхлэх юм.
2. Зөрчлийн хууль бичигдэхдээ нэг том алдаа гаргасан нь 250 гаруй хуулийн хариуцлага гэсэн хэсгийг таслан Зөрчлийн хуульд нэмсэн. Хуулиас хариуцлагын хэсгийг таслаж авснаар зарим хуулийн хэм хэмжээ буруу байх тал бий. Тиймээс 2300 зөрчлийг шинээр томьёолох хэрэгтэй болж байгаа юм. Зарим зөрчлийг нэгтгэж, давхардлыг арилгана.
3. Шийтгэлийг тодорхой бичих бөгөөд зөрчлийн шинж чанар, зөрчил үйлдэгчийн хувийн байдал, зөрчил гаргахдаа гаргасан үйлдэл зэргийг харгалзан үзэж байж, торгуулийг дээд, доод хязгаартай болгож оруулна.
4. Зарим төрлийн зөрчлүүдэд баривчлах шийтгэл оногдуулах шаардлага байна. Тухайлбал, Шүүх хуралдааны хэвийн үйл ажиллагааг тасалдуулсан тохиолдолд шүүгч захирамж гаргаж, баривчлах шийдвэр гаргаж болох юм. Ингэснээр шүүгч, шүүхийн аюулгүй байдлыг хангах юм.
5. Торгууль, шийтгэлээ хугацаанд нь төлсөн тохиолдолд шийтгэлийн төлбөрийн хэмжээг 50 хувиар бууруулдаг эрх зүйн хөшүүргийг оруулна. Жишээ нь, ОХУ-д замын хөдөлгөөний аюулгүй байдлын журам зөрчөөд торгуулийн тасалбар хүлээж авсан хүн долоон хоногийн дотор төлбөрөө төлбөл 50 хувиар бага торгууль төлөх хууль байдаг.
6. Дийлэнх зөрчилд сануулдаг үе шатыг оруулна. Хүний амь, эрүүл мэндэд шууд хор хохирол учруулаагүй нөхцөлд эрх бүхий албан тушаалтнууд 7-10 хоногийн хугацаанд зөрчлөө арилгах албан шаардлага өгдөг болно. Харин энэ хугацаанд зөрчлөө арилгаагүй бол торгууль, шийтгэл ногдуулдаг болох юм. Гэхдээ дөрвөн замын уулзвараар улаан гэрлээр гарч байгаа үед сануулах арга хэмжээ авах боломжгүй учраас зөрчлийн байдлаас хамаарч, тодорхой төрлийн зөрчилд шууд шийтгэл ногдуулна.
Цагдаагийн ерөнхий газрын Зөрчил шалгах, мэргэжил арга зүйн хэлтсийн дарга, цагдаагийн хурандаа Ч.Чинбат “Цагдаагийн байгууллагаас нийтийн ёс суртахуун, олон нийтийн аюулгүй байдалтай холбоотой зөрчлийн хянан шийдвэрлэдэг. Монгол Улсад үйлдэгдэж байгаа зөрчлийн 95 хувийг Цагдаагийн байгууллага дангаараа хянан, шийдвэрлэдэг. Уг хууль нийгмийн дэг журам, олон нийтийн аюулгүй байдлын суурь бүтцийг оруулдаг учраас хуулиар хүлээсэн чиг үүргийнхээ дагуу ажиллаж байна. Гэхдээ төрийн эрх бүхий, зөрчил хянан шийдвэрлэх эрхтэй байгууллагууд орон тоо, бүтцийн хувь бэхжээгүйгээс цагдаагийн байгууллагад энэхүү асуудлыг шийдвэрлэж байна. Одоогийн шинэчилсэн найруулгаар Эрүүгийн хуулиас Зөрчлийн тухай хуульд шилжүүлэх шаардлагатай, Зөрчлийн тухай хуулиас Эрүүгийн хуульд шилжүүлэн гэмт хэрэгт тооцох ёстой үйлдлүүдийг санал болгон оруулж байна. Манай улсад үйлдэгдэж байгаа тодорхой төрлийн зөрчлийн нэгээхэн хэсэг болсон Гэр бүлийн хүчирхийлэл нь гэмт хэрэг бус ахуйн хүрээнд үйлдэгдэж буй зөрчилд тооцох боломж байна. Түүнчлэн танхайрах, олон нийтийн газар биеэ буруу авч явсан бол зарим хор хохиролд нь тааруулан тухайн хүнд тохируулж, торгууль ногдуулах юм” гэв.
