МАХН-ын нэр бүхий гишүүд өчигдөр Монгол Ардын Намд гишүүнээр элслээ. Тодруулбал, орон нутгийн сонгуулиар МАХН-аас Баянгол дүүргийн 23 дугаар хорооноос нэр дэвшиж ялалт байгуулсан төлөөлөгч Э.Магнайбаяр, МАХН-ын мянгатын дарга Ё.Бямбатогтох нар Монгол Ардын Намд элсэж батлахаа гардан авлаа.
Аймаг, нийслэл, сум, дүүргийн ИТХ-ын төлөөлөгчдийг сонгох орон нутгийн сонгууль энэ сарын 15-нд болж өнгөрсөн. Орон нутгийн сонгуулиар Баянгол дүүрэгт МАН-20, АН-18, ХҮН-2, МАХН-1 суудлыг тус тус аваад байсан юм.
БГД-ийн ИТХ-ын төлөөлөгч Э.Магнайбаяр “Монгол Ардын Нам УИХ болон нийслэлд олонхи болсон энэ үед Баянгол дүүргийн иргэд ч МАН-д илүү итгэл хүлээлгэсэн. Монгол Ардын Намд элссэн нь Баянгол дүүргийн 220 мянган иргэнийг бодсон шийдвэр байлаа. Баянгол дүүрэг тэр дундаа 23 дугаар хороонд хийх ажил, шийдвэрлэх асуудал олон бий. Тиймээс олонх болсон намд хүч нэгтгэж ажиллахын тулд элсэж байна” хэмээсэн юм.
Харин БГД-ийн МАХН-ын мянгатын дарга Ё.Бямбатогтох “Монголд хамгийн их үгүйлэгдэж байгаа зүйл бол шударга ёс. Шударга ёсыг тогтоохын тулд бид улс төрийн үйл хэрэгт идэвхтэй оролцож байна. Харамсалтай нь бид бүхний хувьд энэхүү үйл ажиллагаанд биечлэн оролцох боломж хомс байгаа учраас Монгол Ардын Намд элсэж, шударга ёс тогтоохын төлөө хамтарч байна” хэмээлээ.
Цаашид ч МАХН-ын мянгатын дарга, гишүүдээс цөөнгүй хүмүүс МАН-д элсэхээр төлөвлөж байгаа аж. Аль ч намаас сонгогдсон бай Иргэдийн хурлын төлөөлөгч гэдэг иргэдийнхээ эрх ашгийн төлөө ажиллах учиртай. Өнөөдөр намаар талцаж хуваагдах гэхээсээ илүү эвсэн нэгдэж, нэгэн цул болж, нэг зорилгын төлөө ажиллах хэрэгтэй. Тэгж байж улс эх оронд хөгжил ирнэ гэдгийг ойлгож, дэмждэг олон залуусын төлөөлөл тэд боллоо.
МАХН-ын нэр бүхий гишүүд МАН-д элслээ
}
Шинэ мэдээ
