Украины нэрт улстөрч Антоний Геращенко цахим хуудасдаа нэгэн сонирхолтой мэдээлэл байрлуулсан нь ОХУ Монголд Сибирь, Байгаль нуур орчмыг буцаан өгөх ёстой талаар байв.
Тэрбээр “ОХУ дээрэнгүй зан гаргаж хөршүүдээсээ газар нутгийг нь үргэлж булааж ирсэн орон. Тиймдээ ч Крымийг Украинаас булааж авсан. Крымийг буцааж өгөх ёстой. Үүнтэй адилаар Монгол Улсаас булааж авсан Сибирь, Байгаль нуур, Буриадын нутгийг Кремль жинхэнэ эздэд нь буцааж өгөх ёстой” гэжээ.
Украины улстөрчид ОХУ-ын эсрэг эрс шийдэмгий байр суурь баримтлах болоод удсан. Украинчууд хилийн маргаан, газар нутгийн дээрэм тонуулын жишээ авах бүртээ ОХУ-ын хил залгаа орнуудын талаар бичдэг. Энд Монгол Улсын тухай цөөнгүй дурьдагдсан байдаг.
Дашрамд, Монгол Улс Сибирь, Буриад, Байгаль нуурыг 1688 онд Халх, Ойрадын дайны дараа Орост алдсан байдаг. Тэр үед Зүүнгарын хаан Галдан бошгот Оросууд Түшээт хантай дайтаж буйг овжиноор ашиглан оросуудтай хуйвалдаж Халх Монгол руу довтолжээ.
Хүч нь сульдсан халхууд 1688 оны зун хойд талдаа Оросууд, төв нутагтаа Галдангийн цэргүүдтэй хоёр газар ялагдал хүлээснээр Сибирь, Байгаль нуур Оросын эрх мэдэлд очсон юм.
Украины улстөрч А.Геращенко “Монголчууд хууль бусаар газар нутгаа алдсан учир зарга үүсгэвэл алдагдсан нутгаа авах эрх зүйн үндэс бүрэлдэх учиртай” гэжээ.
