Дэлхий дахинд агааржуулалтын холбоотой коронавирусний халдвар гарах магадлал өндөр гэсэн судалгааны дүн гарчээ.
ЭМЯ-ны ахлах шинжээч Д.Нарангэрэлийн мэдээлснээр, БНХАУ-ын Ухань хотод ресторанд хоол идэж байхдаа хүмүүс агааржуулалттай холбоотой өвчлөл авсан байж болзошгүй гэсэн судалгааны дүн байгаа аж. Мөн АНУ, Франц, Дани, Польш зэрэг оронд махны үйлдвэр эрхэлдэг хүмүүс олноороо коронавирусээр халдварласан байна. Үүний шалтгаан нь агааржуулалт муутай битүү орчинд байх, агааржуулалтын хоолой муу ажиллах зэрэг нь нөлөөлж байгааг тогтоожээ. Түүнчлэн БНСУ-д хийсэн нэг байрны судалгааны дүнгээр, агааржуулалтын хоолой муу ажиллах нь коронавирс тараах эрсдэлтэй гэжээ.
Харин манай улсад нэг орон сууцанд халдвар гарч байгаа тохиолдол нийслэл хотод 3-4 кластер бүртгэгдээд байна. Сүүлийн үед БГД-ийн 19 дүгээр хороонд нэг орцонд өвчлөл хоёр өдөр дараалан бүртгэгдсэн. Иймээс НЭМҮТ, Мэргэжлийн хяналтын байгууллагатай хамтран тандалт судалгаа хийж байгаа бөгөөд маргааш судалгааны дүнг танилцуулах аж.
