АНУ-ын шинэ Ерөнхийлөгч Жозеф Байден ажилдаа орсон эхний өдрөө өмнөх Ерөнхийлөгч Дональд Трампын шийдвэрүүдийг цуцлах зарлигт гарын үсэг зурлаа.
Тэрбээр коронавирусийн эсрэг авах арга хэмжээг шинээр боловсруулжээ. Мөн зарим исламын шашинтай орны иргэдийг АНУ руу нэвтрэхийг хориглосон Трампын шийдвэрийг цуцалж, Мексикийн хананы барилгын ажлыг царцаасан байна.
Мөн уур амьсгалын өөрчлөлтийн талаарх Парисын гэрээнд эргэн нэгдэхээ амласан. Түүнчлэн АНУ-д хүүхэд байхдаа хууль бусаар цагаач эцэг, эхтэйгээ ирсэн хүмүүсийг тус улсаас хөөх оролдлогоо зогсоохыг шаардсан зарлигт Ерөнхийлөгч гарын үсэг зурж, цагаачлалын албанд илгээхээр болжээ.
Трампын засаг захиргаа DACA хэмээн нэрлэгддэг Барак Обамагийн энэ бодлогоос ангижрахаар дөрвөн жилийн турш эрмэлзэж байсан ч шүүхэд ялагдсан байна.
Түүнчлэн Байден ДЭМБ-аас гарах үйл явцыг зогсоож, холбооны бүх байгууллагуудад засгийн газрын ажилтнуудад амны хаалт зүүж, зай барих шаардлага тавьсан байна.
Тэрбээр Цагаан ордонд очсон даруйдаа тус улсад хүнд цохилт үзүүлсэн гэж үзэж буй Дональд Трампын шийдвэрүүдэд өөрчлөлт оруулна гэдгээ хэлж байсан юм. Өмнөх засаг захиргааны авч хэрэгжүүлж байсан бодлого нь улс орныг сүйрүүлэх хэмжээнд хүргэсэн бөгөөд ажлын эхний 10 хоногт Дональд Трампын гаргасан шийдвэрүүдийг өөрчлөх болно гэж Байдены баг мэдэгдэж байв.
Дональд Трампын хэрэгжүүлж байсан бодлогын уршгаар АНУ коронавирусийн халдвартай холбоотой, түүнээс үүдсэн эдийн засгийн, мөн уур амьсгалын болон арьс өнгөөр ялгаварлах үзлийн гэх мэт дөрвөн төрлийн хямралтай нүүр тулсан гэжээ. Эхний 10 хоногт Байден энэ дөрвөн асуудлыг шийдвэрлэх шийдэмгий алхмуудыг хийж, дахин хямралд өртөхөөс сэргийлэх болно гэж мэдэгдсэн байна.
