Хөдөлмөрийн үндэсний нам (ХҮН)-аас Орон нутгийн хөгжлийн сангийн хөрөнгөөр хийх ажлын талаар иргэдээс авсан саналыг хүчингүйд тооцох шаардлагыг Сангийн сайд, Нийслэлийн Засаг дарга бөгөөд Улаанбаатар хотын Захирагч, нийслэлийн 9 дүүргийн Засаг дарга нарт хүргүүлэв.
Энэ талаар ХҮН-ын Улс төрийн бодлого, үйл ажиллагаа хариуцсан Нарийн бичгийн дарга Б.Мөнхдөл хэвлэлийн хурал хийхдээ, “Орон нутгийн хөгжлийн сан (ОНХС)-гийн хөрөнгийн эх үүсвэр нь Ашигт малтмалын нөөц ашигласны албан татвар. Сангийн хөрөнгөөр иргэдийн саналыг үндэслэн сум, хороодод бүтээн байгуулалт хийдэг. Энэ бол шууд ардчиллын нэг хэлбэр юм. Өнгөрсөн 8 жилийн хугацаанд уг сангийн 1.1 их наяд төгрөгөөр бүтээн байгуулалт хийсэн байна. Энэ жил улсын хэмжээнд 220.7 тэрбум төгрөг төсөвлөснөөс 31 тэрбумыг нь нийслэлд хуваарилсан. Уг хөрөнгөөр хийх ажлын талаар иргэдийн саналыг авч эхэлсэн. Гэхдээ зарим хорооны хэсгийн ахлагч иргэдийн өмнөөс санал өгсөн тухай мэдээлэл бидэнд ирж байна. УИХ-ын сонгуулийн санал хураалт ч 100 хувийн ирцтэй байдаггүй. Гэтэл ОНХС-гийн хөрөнгөөр хийх ажлын тухай санал асуулгад Сүхбаатар дүүргийн 13, 17, Хан-Уул дүүргийн 5, 8, Багахангай дүүргийн 1, 2 дугаар хорооны насанд хүрсэн бүх хүн санал өгсөн байна. Нийслэлийн удирдлагууд энэ сарын 20 гэхэд уг сангийн хөрөнгийг хэрхэн зарцуулах талаар санал асуулгад иргэдийг хамруулах үүрэг өгсөн гэсэн мэдээлэл ирлээ. Энэ үүргийг биелүүлэхийн тулд хэсгийн ахлагч нар иргэдийн өмнөөс санал өгч байгаа. Тиймээс иргэдийн өмнөөс өгсөн саналыг хүчингүйд тооцож, албан тушаалтнуудад хариуцлага тооцохыг шаардаж байна” гэлээ.
Иргэдийн өмнөөс нь санал өгөх нь Төрийн болон орон нутгийн өмчийн тухай, Төрийн албаны тухай, Төсвийн тухай зэрэг хуулийг ноцтой зөрчсөн үйлдэл хэмээн үзэж байгаа аж.
