Дөрөвдүгээр сарын 5-ны өдрийг хүртэл улбар шар түвшиндээ буюу халдвар хамгааллын дэглэмээ ягштал баримталж, хамтран ажиллах шийдвэр гаргалаа гэж Улсын онцгой комиссоос мэдээллээ.
Засгийн газрын хуралдаанд энэ шийдвэрээ маргааш танилцуулна гэлээ.
Үйлчилгээний байгууллагуудад зарим зохицуулалт хийж, 14 хоногийн хугацаанд эрсдэл гаргахгүй байх тал дээр иргэд, аж ахуйн нэгжүүд илүүтэй анхаарч ажиллах зөвлөмж гаргахаар шийджээ.
УОК, Засгийн газрын зүгээс аль болох иргэдийн үйл ажиллагааг хязгаарлахгүйгээр, зохион байгуулалтыг зөв хийх замаар халдварын тоог бууруулахад анхаарч ажиллана.
Явуулын оношлогоо, эмчилгээний газруудыг нээсэн тул хатуу хөл хорио тогтоохгүй байх нь зүйтэй гэж үзлээ гэж УОК-ын дарга, Шадар сайд С.Амарсайхан мэдээллээ. Сэтгүүлчдийн асуултад хариулж байна.
-Улаанбаатар хот бүхэлдээ эрсдэлтэй байна гэж ЭМЯ мэдээлсэн. Хэдэн хороо эрсдэлтэй байгаа вэ? Гэрээр эмчлэх тооцоо судалгаагаа хэр хийсэн бэ? Орны хүрэлцээ хэр байна?
-Өнөөдрийн байдлаар мянга гаруй ор нөөцөнд байна. Хэсэгчилсэн хөл хорионы ажил цаашдаа ч үргэлжилнэ. Гэрээр эмчлэх тухайд шинж тэмдэггүй, хөнгөн, өөрийнх нь нөхцөл байдлыг харгалзан гэрээр эмчилнэ. Хэрвээ тухайн хүн гэртээ баймааргүй байна гэвэл тусгаарлалтын байранд байрлуулна. Цаашдаа эрсдэл өндөртэй зорилтот бүлэг рүүгээ анхаарч ажиллана.
SBN телевизийн сэтгүүлч:
-Өдөрт илрэх халдварын тоо нэмэгдсээр байна. Тэмцэж байгаа арга барилаа хэр зөв гэж бодож байна. Хэсэгчилсэн хөл хориогоо шинжлэх ухааны ямар үндэслэлтэй гэж үзэж байна вэ? Хэдэн хүүхэд коронагаар өвдсөн байна вэ? Шөнийн хөл хорио шинжлэх ухааны ямар үндэслэлтэй шийдвэр вэ? Цагдаа нарыг шөнөжин зогсоогоод байх шаардлага байна уу, тэртэй тэргүй баар ресторанууд шөнийн цагаар ажиллахгүй байгаа шүү дээ. Вакцин байгаа юу, нөөц нь дууссан гэдэг зарлалыг зарим хороод наасан байна?
-Вакцины нөөц дуусаагүй. Өнөөдрийн байдлаар 223 мянган хүнийг вакцинжуулсан. Одоо 240 мянга гаруй хүн тун вакцин байна. Дараагийн вакцины татан авалт үргэлжлэн орж ирнэ. Биднээс шалтгаалахгүйгээр саатах асуудал гарахгүй бол вакцинжуулалт төлөвлөгөөний дагуу явна. Дараагийн вакцины татан авалт дөрөвдүгээр сард эхэлнэ. Хэсэгчилсэн хөл хориог цаашдаа тогтоохдоо Түр журамд заасны дагуу 24 цагийн өмнө иргэдэд мэдэгдэж, мэдээ мэдээллээ бүрэн өгөхөд анхаарч ажиллана. Зарим тохиолдолд ойлголтын зөрүү гарч байгаа учир зохион байгуулалтыг сайжруулах шаардлагатай.
Эрүүл мэндийн сайд С.Энхболд:
-Арваннэгдүгээр сараас хойш гурван удаагийн хатуу хөл хорио тогтоосон. Хэрвээ ингээгүй бол халдварын тоо өдгөө 4-5 мянгад хүрэх байсан. БЗД-ийн 26-р хороо сүүлийн 3 сарын хугацаанд батлагдсан тохиолдол өндөр гардаг хороо. Хүн амын нягтаршил ихтэй. Нийт 31 мянга гаруй хүн амтай. ХУД-ийн 15-р хороо мөн голомтын тархалт өндөртэй. Эдгээрт тандалт судалгааг хийж байгаа. Дотоодод халдвар бүртгэгдсэнээс хойш нийт 747 хүүхэд халдвар авсан. Нэг хаалга-Нэг шинжилгээ маш үр дүнтэй болсон. Үр дүнд нь далд байсан 36 голомт, 219 тохиолдлыг илрүүлснээр тархалтыг хумиж, вакцинжуулалтын бэлтгэл ажиллагааг хангахад үр дүнтэй ажил болсон. 65-аас дээш насныханд ирэх долоо хоногоос эхэлнэ.
-Халдварын тархалт 200+ гараад байхад хатуу хөл хорио тогтоохгүй гээд байгаагийнхаа учрыг тайлбарлаач?
-Шинэ засгийн газар бүрэлдээд тал талын тоо баримт дээр тулгуурлаж мэдээллээ гаргаж байна. Халдварын тоо ихсэж байгаа цаашдаа ч нэмэгдэнэ. УОК, Засгийн газар цаг үеийн нөхцөл байдалтай зохицуулж, арга тактикаа өөрчилж ажиллаж байна. Энэ цаг үеийн эрсдлийг бид урьдчилан харж, тусгайлсан дүрэм журмуудаа боловсруулж, голомтод тархсан шинжилгээнүүдээ хийсэн.
