АНУ Оросын эсрэг шинэ хориг арга хэмжээ авч эхэллээ. Жо Байдены засаг захиргааны ОХУ-ын эсрэг авч хэрэгжүүлж буй анхны хориг арга хэмжээ нь Оросыг “SolarWinds” компанийг хакердсан, АНУ-ын Ерөнхийлөгчийн сонгуульд хөндлөнгөөс оролцсон гэж буруутгаснаас үүдэлтэй юм.
ОХУ-ын зүгээс АНУ-ын хоригийг зэмлэн буруутгаад “Хариу арга хэмжээ авна” гэж ОХУ-ын Ерөнхийлөгчийн хэвлэлийн нарийн бичгийн дарга Дмитрий Песков мэдэгдсэн юм.
АНУ-ын хоригт юу юу багтсан бэ?
АНУ Вашингтон дахь ОХУ-ын Элчин сайдын яамны 10 дипломат ажилтныг нутаг буцаахаар болжээ. Тэдний дунд Оросын тагнуулын албаны хүмүүс байгаа гэж АНУ үзсэн байна.
Мөн АНУ-ын Сангийн яам Оросын өртэй холбоотой зарим гүйлгээнд хориг тавих, АНУ-ын эсрэг кибер хорлон сүйтгэх ажиллагаа явуулах Оросын тагнуулын байгууллагыг дэмжсэн технологийн компанийн эсрэг хориг арга хэмжээ авчээ.
Төв банк, Үндэсний баялагийн санг хоригт хамруулж, компаниуддаа 2021 оны зургаадугаар сарын 14-нөөс хойш гаргасан бондыг шууд эзэмшихийг хоригложээ.
Түүнчлэн Жо Байден кибер салбарт дайсагнасан ажиллагаа явуулах, АНУ-ын Ерөнхийлөгчийн сонгуульд хөндлөнгөөс оролцох зэрэг хэд хэдэн үйл ажиллагаа явуулсан гэж Оросын хувь хүн, хуулийн этгээдүүдийн эсрэг шинээр хориг арга хэмжээ авах талаар тусгасан гүйцэтгэх захирамжид гарын үсэг зурсан байна.
АНУ-ын Сангийн яам Ерөнхийлөгчийн сонгуульд нь ОХУ хөндлөнгөөс оролцсон хэрэгт холбогдуулан 16 байгууллага, 16 хувь хүнд хориг арга хэмжээ авчээ. Тэдний дунд Ерөнхийлөгчийн Тамгын газрын дэд дарга Алексей Громов, сэтгүүлч Александр Малькевич, Тагнуулын ерөнхий газрын ажилтан асан Денис Тюрин, Орос, Украины улс төрийн зөвлөх Константин Килимник нар багтсан байна.
Крымтэй холбоотойгоор найман хувь хүн, хуулийн этгээдийн эсрэг хориг тавьжээ. Үүнд Оросын Засгийн газрын гишүүд багтжээ. Тухайлбал, “Мостотрест” компанийн ерөнхий захирал Леонид Рыженькин, “Ленпромтранспроект” компани, “Беркакит-Томмот-Якутск” чиглэлийн төмөр замын барилгын компани багтсан байна.
ОХУ-ын бизнесмен Евгений Пригожинтой хамтран ажиллаж байна гэж үзэн “Транс-Ложистик”, “Алкон”, “Юнижет” компаниудыг хоригт багтаав.
