УИХ-ын Нийгмийн бодлогын байнгын хорооны өнөөдрийн хуралдаанаар Нийгмийн даатгалын тухай хуульд өөрчлөлт оруулах тухай хуулийн төслийн хэлэлцэх эсэхийг хэлэлцээд хуулийн төслийг хэлэлцэхийг дэмжлээ. Хэлэлцэж байгаа асуудалтай холбогдуулан гишүүд асуулт асууж, хариулт авлаа.
Тус хуулийн төсөлд долдугаар сарын 1-ээс НДШ-ийг хоёр хувиар бууруулах заалт туссан. Гэхдээ долдугаар сарын 1-ээс НДШ хоёр хувиар нэмэгдэх юм. Хэрвээ тус хуулийн төслийг оруулж ирснээр нь баталбал долдугаар сарын 1-ээс НДШ нэмэгдэхгүй өнөөдрийн төлж байгаа буюу иргэн, байгууллага тус бур 8.5 хувиар НДШ төлнө. Хэлэлцүүлгийн үеэр гишүүд тус хуулийн хэрэгжилтийг 2021 оны нэгдүгээр сарын 1-ээс хэрэгжүүлэх санал гаргаж байсан. Энэ нь хуулийн төслийн хэлэлцүүлгийн үеэр шийдэгдэх юм.
УИХ-ын гишүүн Ч.Ундрам: Хууль санаачлагч гишүүд НДШ-ийг хоёр хувиар бууруулах биш хугацааг нь хойшлуулах асуудлыг судалж үзсэн үү. Бид ОУВС-гийн хөтөлбөрт хамрагдахдаа тодорхой хэмжээний үүрэг амлалт авчихсан.
УИХ-ын гишүүн Т.Энхтүвшин: Үүнийг бид судалж үзсэн. Цар тахал хэзээ дуусах нь, эдийн засаг хэзээ сэргэх нь тодорхойгүй байна. Дээр нь ажлын байраа хадгалж үлдэх хэрэгтэй. Тиймээс энэ хуульд өөрчлөлт оруулаад явах нь зүйтэй гэж үзсэн. ОУВС-ийн гэрээгээр НДШ-ийг нэмэгдүүлэх хууль баталсан. НДШ хоёр хувиар нэмэгдвэл аж ахуйн нэгжүүдэд хүндрэлтэй гэж үзэж энэ хуулийн төслийг оруулж ирж байна.
УИХ-ын гишүүн С.Чинзориг: НДС алдагдалтай байдаг учраас хувь хэмжээг нэмэгдүүлж байна гэж би боддоггүй. 2008 онд АН НДШ-ийг таван хувиар буюу огцом бууруулчихсан юм. Үүнээс шалтгаалаад сангийн орлого буурах, алдагдал үүсэх нөхцөл байдал үүссэн. Цар тахлын үед Засгийн газар тодорхой арга хэмжээ авч байгаа. Засгийн газар 750 орчим тэрбум төгрөгийн хөнгөлөлт чөлөөлөлтийг НДС-аас үзүүлсэн. Энэ бол цар тахлын дэгдэлтийн үед ажлын байрыг хадгалахад чухал үүрэг үзүүлсэн байх. Гишүүдийн өргөн барьсан хуулийн төслийн зарчмыг дэмжиж байна. Гэхдээ Үндсэн хуульд оруулсан нэмэлт, өөрчлөлтөөр гишүүд төсвийн орлого, зарлагыг нэмэгдүүлэх боломжгүй болсон. Хэрвээ үүнийг шийдье гэж байгаа бол тогтоол гаргах ёстой.
УИХ-ын гишүүн Д.Сарангэрэл: Хуулийн төслийг дэмжиж байна. НДШ-ийг бууруулах асуудлаар иргэд гишүүдэд хандаж байна. Хуулийн төсөл оруулж ирсэн гишүүдэд талархаж байна. 2021 оны нэгдүгээр сарын 1-ээс НДШ-ийг бууруулах нь зөв. Сангийн яам нэмэлт эх үүсвэр олох, тодотгол хийх замаар асуудлыг шийдэхээр ажиллаж байгаа юм байна.
