СЕХ-ны Хуулийн хэлтсийн дарга Д.Бат-эрдэнэ: Өчигдөр АН-аас санал тоолох төхөөрөмжид хөндлөнгийн нөлөөлөл ордог байж болзошгүй гэсэн мэдээлэл хийсэн. Энэ бичгийн хувийг Тагнуулын ерөнхий газарт хүргүүлж байгаа. Сонгуулийг луйвардсан гэх асуудлаар холбогдох байгууллага гомдол гаргаж байв уу, шалгаж байсан уу, шалгасан бол ямар шийдвэр гарсан бэ үүнийг олон нийтэд нээлттэй танилцуулна уу хэмээн Нийслэлийн Прокурорын газарт мэдээллийг дамжуулсан.
Сонгууль дөхөөд эхлэхээр л санал тоолох төхөөрөмжийн үйл ажиллагаатай холбоотой олныг төөрөгдөлд оруулсан үнэн, худал мэдээ мэдээлэл цацдагаа улс төрийн нам эвслүүд, сонгуульд оролцож байгаа нэр дэвшигчдийн зүгээс цацдаг. 2012 оноос хойш сонгуулийн үйл ажиллагаанд автоматжуулсан системийг хэрэглэж байгаа. Энэ хугацаанд санал тоолох төхөөрөмж буруу тоолж, санал зөрүүлчихлээ гэх нэг ширхэг ч бодитой мэдээллийг гаргаж байгаагүй.
Энэ асуудалд бид тодорхой хэмжээнд цэг тавих ёстой гэж үзэж байна. Мөн хэвийн явагдаж байгаа сонгуулийн зохион байгуулалтын үйл ажиллагааг алдагдуулж, илт худал мэдээлэл олон нийтэд тарааж байгаа энэ үйлдэл нь өөрөө гэмт хэргийн шинжтэй байж болзошгүй шүү гэдэг асуудлаар холбогдох байгууллагад СЕХ хандана гэсэн бодолтой байна.
СЕХ-ны дэргэдэх Мэдээлэл технологийн төвийн захирал Х.Баясгалан: Сонгуулийн санал тооллогын машиныг нийт 8 удаагийн сонгуульд ашиглаж байна. Энэ хугацаанд сонгуулийн өмнө болон дараа ялагдсан намын этгээдүүд тус машины талаар худал, ташаа мэдээллийг явуулдаг. Төрийн сонгуулийн ажлыг зохион байгуулахад 30 орчим мянган төрийн албан хаагчид оролцдог. Эдгээр хүмүүсийн хийж байгаа ажлыг ингэж худал ташаа мэдээллээр үгүйсгэж байгаа нь маш их харамсалтай байна.
Өчигдөр санал тооллогын машины талаар мэдээлсэн мэдээлэл дээр үндсэн хэд хэдэн баримт хэлье. Нэгдүгээрт, машины лицензтэй холбоотой асуудал дээр санал тооллогын машины хугацаа дуусна, лиценз дуусна гэсэн асуудал огт байхгүй. Бид ашиглах бүрдээ төлбөрөө төлөөд явдаг. Хоёрдугаарт, саналын хуудасны бар кодыг уншихаа больсон нь хардлага төрүүлж байна гэж ярьсан. Үүн дээр хардах ямар ч боломж байхгүй. Төхөөрөмж өөрөө бар кодоо уншиж байж тухайн мандатуудыг ялгадаг. Тэгэхээр бар кодгүй байх ямар ч боломжгүй, үндэслэлгүй мэдээлэл. Өмнөх сонгуулийн саналын хуудас бүгд архивт хадгалагдаж байгаа. Бүгд бар кодтойгоо байгаа. Түүнчлэн санал тооллогын машинд хөндлөнгөөс нөлөөлөхийн тулд их хэмжээний хахуул өгсөн гэдэг нь ч худлаа. Хакердсан гэх хоёр залуу манайд ирээд ажилласан гэх юм ярьж байсан. Манайх тийм хүмүүсийг ажиллуулж байгаагүй, танихгүй.
Төрийн эрхийг хууль бусаар авах, үүнд оролцох гэдэг асуудал бол маш хүнд ял оногддог учраас энэ бол тоглоом биш. Хувь хүний хоорондын асуудлыг төрийн байгууллага руу ингэж нялзааж болохгүй. Бид сонгууль зохион байгуулахдаа нэгд, ил тод ажиллаж, хоёрт хуулийг дээдэлж, гуравт шударга ёсыг баримтлан ажиллаж байна.
Өмнө нь хуулийн хүрээнд саналын хуудсын 50 хүртэлх хувийг гараар тоолдог байсан бөгөөд нэг ч удаа үр дүн зөрж байгаагүй. Энэ удаагийн сонгуулийн хуульд бүх саналын хуудсыг 100 хувь гараар тоолох өөрчлөлт орсон. Үүнийг маш зөв гэж бодож байгаа. Энэ сонгуулийн дараа энэ бүхний эргэлзээ тайлагдана гэж бодож байна.
