Гандантэгчэнлин хийдийн Батцагаан дуганд маргааш Тэргүүн хамба лам Д.Чойжамцад бат оршил өргөх хурал болж байна.
Монгол Улсын Ерөнхийлөгч Х.Баттулга зургадугаар сарын 14-ний өдөр Хамба Номун хан цол соёрхон батлах тухай 171 дүгээр зарлиг гаргажээ. Уг зарлигт “Хамба номун хан цол соёрхон батлах тухай Монголын Бурханы шашинтны төвийн Тэргүүн лам нарын зөвлөлийн 2018 оны 9 дүгээр сарын 29-ний өдрийн хурлын 1 дүгээр тогтоолыг дэмжиж, Монголын Бурханы шашинтны төв Гандантэгчэнлин хийдийн хүсэлтийг биелүүлсүгэй хэмээн, Монгол Улсын Үндсэн хуулийн Гучин дөрөвдүгээр зүйлийн 1, Монгол Улсын Ерөнхийлөгчийн тухай хуулийн 9 дүгээр зүйлийн 1, Төр, сүм хийдийн харилцааны тухай хуулийн 4 дүгээр зүйлийн 1, 2 дахь хэсэг, мөн хуулийн 5 дугаар зүйлийн 2 дахь хэсэг, Монгол Улсын Үндэсний аюулгүй байдлын үзэл баримтлалын 3.1.4 дэх заалтыг тус тус үндэслэн ЗАРЛИГ БОЛГОХ нь:
1. Монголын Бурханы шашинтны төвийн Тэргүүн лам нарын шийдвэрээр Монголын Бурханы шашинтны төв Гандантэгчэнлин хийдийн Тэргүүн Их Хамба ламд “Хамба номун хан” цол өргөмжилснийг соёрхон баталсугай.
2. Монголын Бурханы шашинтны төв Гандантэгчэнлин хийдийн Тэргүүн Их Хамба лам, “Хамба номун хан” Та уламжлалт бурханы шашин,
соёлыг сэргээн хөгжүүлж, сүм хийдийн үйл ажиллагааг нийгмийн оюун санааг гэгээрүүлэх, үндэсний эв нэгдлийг бэхжүүлэх, зовлон гамшигт
нэрвэгдсэн хүн ардад туслалцаа үзүүлэх, байгаль орчныг хамгаалахад чиглүүлж, сүсэгтэн олныхоо тусын тулд энэрэн нигүүлсэхүйн ёст номын
үйлээ бурханы шашны түүхэн уламжлалын дагуу Монгол Улсын хууль тогтоомжид чанд нийцүүлж эрхлэн явуулсугай.” гэсэн байна.
Тиймээс энэ удаагийн бат оршил өргөх хурлын үеэр Тэргүүн хамба лам Д.Чойжамцыг Хамба Номун ханд өргөмжилж байгаа юм. Энэ талаар Гандантэгчинлэн хийдийн Хэвлэл мэдээлэл, олон нийт хариуцсан лам Ц.Бямбажаргалаас тодруулахад:
-Хамба Номун хан ламтан Д.Чойжамцад бат оршил өргөх хурал хийж байна. Энэ нь нас өндөр гарсан нийт лам нарт эрүүл энх байх, урт удаан наслах, цаашдын ажил үйлсийг нь ерөөж хийдэг хурал. Дээр үеэсээ бурхан хүрээний хамбыг Номун ханд өргөмжилдөг байсан гэлээ.
Гандантэгчэнлин хийдийн тэргүүн хамба Д.Чойжамц 29 дэх Номун ханаар өргөмжлөгдөж байгаа юм байна.
