ОХУ-ын газрын тосны гол хоёр индекс ханш сүүлийн 10 өдрийн турш тасралтгүй буурч, өнгөрөгч тавдугаар сараас хойших хамгийн доод түвшинд хүрээд байна. Тодруулбал, “ESPO” лхагва гаригийн арилжааны байдлаар 3.22 хувь буурч баррель тутамд 65.12 ам.доллар болсон бол “Sokol” 2.29 буурч 66.96 ам.долларт хүрчээ. Тэгвэл энэхүү бууралт манай улсын зах зээлд нөлөөлөх эсэхийг Ашигт малтмал газрын тосны газрын дэд дарга Ц.Эрдэнэбаяраас тодрууллаа.
-Дэлхийн зах зээл дээр газрын тосны үнэ буурч байна. Энэ бууралт манайд нөлөөлөх боломжтой юу?
– Огцом бууралт бол явагдаагүй. 73,74-тэй байж байгаад одоо 68-руу орж хэлбэлзээд байна. Роснефть үнээ тооцохдоо Сингапурын бирж дээрх наймдугаар сарын дундаж үнээр боддог. Тэгэхээр наймдугаар сарын 25 хавьцаа Роснефтээс үнэ орж ирнэ.
-Олон улсын зах зээл үнээ бууруулсан ч манайхан бууруулдаггүй гэдэг шүүмжлэл байдаг. Үүнд та ямар хариулт өгөх вэ?
– Бууралгүй яах вэ. Өнгөрсөн оны нэгдүгээр сард нэг литр бензин 1820 төгрөг байсан. Дөрөвдүгээр сард 500 төгрөгөөр буурч 1320 болсон. Гадаад зах зээлд буух үед нь буурсан. Гагцхүү хүмүүс буурсныг нь мэддэггүй өссөн үед нь “өслөө” гэж их ярьдаг.
-Шатахууны үнээ дагаад өргөн хэрэглээний барааны үнэ өсчихөөд шатахууны үнэ буурсны дараа барааны үнэ буудаггүй болохоор тэр байх л даа?
-Өргөн хэрэглээний барааны үнэ бол манай хариуцдаг ажил биш. Гэхдээ миний хувийн байр суурь гэвэл шатахууны үнэ буурахад өргөн хэрэглээний барааны үнэ дагаад буух ёстой. Өнгөрсөн долдугаар сард шатахууны үнэ өсөхөд такси нэг км тутамдаа 500 төгрөгөөр өссөн байна. Нэг литр бензиний зарцуулалт өөрөө хэр байх вэ гэдэг асуулт их сонин. Нэг км тутамд 500 төгрөгийн шатахуун нэмж зарцуулна гэж хэзээ ч байхгүй. Жижиг тэрэг 100 км замд 10 литр шатахуун зарцуулдаг гэж бодоход 10 км замд 1 литр шатахуун зарцуулна. Тэгэхээр 1 км замд 100 гр шатахуун зарцуулж байна гэсэн үг. 100 гр шатахуун 205 төгрөгтэй тэнцэнэ. Гэтэл такси 1км замд 1500 төгрөгөөр үйлчилж байна. Энэ мэт математик аргачлалаа сайн гаргаж өгөхгүй байна уу гэж хардаг.
