… Түвшинбаярын агсам байдлыг эрт зассан бол

Олимпийн аварга Н.Түвшинбаяр архидан согтуурч багын найзаа хэрцгийгээр зодож гэмтээснээр барахгүй найз нь гэмтлээ даахгүй нас барсан хэрэг одоо ид хуулийн байгууллагад шалгагдаж байгаа.

Зарим эх сурвалж Н.Түвшинбаярын ууж байсан архинд сэтгэцэд нөлөөлөх зүйл хийснээс өөрийгөө хянах чадваргүй болсон, хагас галзуурсан гэх мэтээр өмөөрсөн өнгө аястай мэдээлэл цацаж байгаа ч үнэн хэрэгтээ Н.Түвшинбаяр нь угаасаа л агсам дээрэнгүй зан авиртай байсныг нотлох цөөнгүй жишээ байгаа. Улсын заан Н.Баярсайханыг хүн харахын эцэсгүй болтол зодсон гэх мэт.

Тэгвэл тэр бүр багадаа буюу хөдөөгийн арван жилийн сурагч байхаасаа л гашуун нясуун юманд шүлэнгэтдэг уухаараа овилгогүй ааш араншинтай нэгэн байжээ. Үүнийг түүний анхны хайрын эзэн Т гэгч бүсгүйн найз нөхөд шогшрон ярьдаг байна.

Т бүсгүй волейбол тоглодог өндөр царайлаг нэгэн аж. Түвшинбаяр тэр хоёр Булган аймгийн сургуульд хамт суралцдаг байсан бөгөөд хар багаасаа үерхсэн бүр сууж нийлэх дээрээ тулж байсан ч Түвшинбаяр бүсгүйг маш их харддаг байж. Зүгээр ч нэг хардахгүй архи ууж согтоод, алганы амт үзүүлчихдэг нэлээн ширүүн хөвгүүн байжээ.

Тиймээс Т бүсгүйн эгч дүүгээ балмад танхай юмны гарт үхэх чинь дутаа юу гэж үглэж загнасаар байгаад тэр хоёрыг салгажээ. Үүнд Түвшинбаярын хүүхэмсүү зан ч бас нөлөөлсөн байна. Тэрбээр оюутан болж хотод ирсэнээсээ хойш өөр нэг бүсгүйтэй наана цаана болж байгаад Т-д баригдаж, нэгэнт сэтгэл шулуудсан бүсгүй замаа хөөж оджээ.

Түвшинбаяр түүнд үнэхээр хайртай байсан бололтой. Олимпийн аварга болсон хойноо “Би албан ёсоор эхнэр авч гэр бүл болчихсон юм байхгүй. Чамд би хайртай хэвээрээ байгаа шүү. Би дараачийн олимпод оролцоод бас л аварга болно. Наана нь би бүх юмаа зохицуулчихаад чамтай сууна” гэж хэд хэдэн удаа утсаар ярьсан ч Т бүсгүй нүүр өгөөгүй аж.

Энэ нь ч оносон буй за. Ийнхүү бичсэнээр бүдэрсэн хүнийг дэвсэлж байгаа юм биш.

Харин Түвшинбаярын аав ээж, ах дүүс түүний овилгогүй ааш араншинг засаж болчимгүй үйлдэл хийхээс хамгаалж байсан болоосой гэсэн санааных юм. Төрүүлж өсгөсөн эцэг эх нь, нэг гэрт хамт өсөж торнисон ах дүүс нь түүний муухай ааш авирыг мэдэхгүй байна гэж юу байхав. Хэрвээ түүнийг зөв хүмүүжүүлж төлөвшүүлсэн бол өдийд хоёр айлын амьдрал сүйрч олон хүүхэд харуусал, хагацал үзэхгүй байсан нь мэдээж. Хүн болох багаасаа, хүлэг болох унаганаасаа гэдэг зүгээр ч нэг үг биш шүү.

Б.ЗУЛ