Үндсэн хууль дахь давхар дээлтэй холбоотой заалтыг хүчингүй болгосноор Засгийн газрын бүтэц, бүрэлдэхүүнийг өөрчлөх шаардлага үүсээд буй. Тэгвэл Засгийн газрын бүтэц, бүрэлдэхүүнд өөрчлөлт оруулахтай холбоотой хуулийн төслийг өнөөдөр УИХ-д өргөн барихад бэлэн болжээ.
Гэвч үүний өмнө Үндсэн хуулийн өөрчлөлтийг Ерөнхийлөгч ёсчлох учиртай. Өчигдөр буюу 2022 оны наймдугаар сарын 25-нд УИХ-ын чуулганы хуралдаанаар цэцийн тогтоолтой холбогдуулан Монгол Улсын Үндсэн хуулийн Гучин есдүгээр зүйлийн 1 дэх хэсгийн “… Ерөнхий сайд болон Засгийн газрын дөрвөөс илүүгүй гишүүн Улсын Их Хурлын гишүүний албан тушаалыг хавсарч болно” гэдэг заалтыг хүчингүй болгосон билээ.
Монгол Улсын Үндсэн хуульд нэмэлт, өөрчлөлт оруулах журмын тухай хуульд:
18.11.Монгол Улсын Үндсэн хуулийн холбогдох зүйл, хэсэг, заалтыг хүчингүй болгосноос хойш ажлын хоёр өдрийн дотор Монгол Улсын Их Хурлын дарга Монгол Улсын Ерөнхийлөгчид биечлэн хүргэж, танилцуулна.
18.12.Монгол Улсын Ерөнхийлөгч танилцсанаас хойш ажлын гурван өдрийн дотор “… оны … дугаар сарын …-ны өдөр Монгол Улсын Үндсэн хуульд оруулсан өөрчлөлтийн уг эх мөн болой. Монгол Улсын Ерөнхийлөгч …” гэсэн гарын үсэг зурж, төрийн тамга дарж баталгаажуулан Монгол Улсын Үндсэн хуулийн уг эхийн хамт хадгална.
18.13.Монгол Улсын Ерөнхийлөгчийн нотлон баталгаажуулсан уг эхийг Монгол Улсын Үндсэн хуульд байршуулж, “Төрийн мэдээлэл” эмхэтгэлд нийтлэх бөгөөд түүнийг албан ёсны эхэд тооцно гэж заасан байдаг.
Энэ дагуу Үндсэн хуулийн заалтыг хүчингүй болгосныг Ерөнхийлөгч өнөөдөр ёсчилсон гэдэг мэдээлэл байна. Ингэснээр Үндсэн хуулийн өөрчлөлттэй уялдах Засгийн газрын тухай хуулийг өргөн барихад бэлэн болсон гэсэн үг.
Засгийн газрын тухай хуулийг өнөөдөр 14:00 цагт Төрийн байгуулалтын байнгын хороогоор, 16:00 цагт чуулганы нэгдсэн хуралдаанаар хэлэлцэхээр төлөвлөжээ.
