АНУ-ын Нью-Йорк хотноо болж буй НҮБ-ын Ерөнхий Ассамблейн 77 дугаар чуулга уулзалтын Хувьсаж буй боловсрол дээд хэмжээний чуулга уулзалтад Боловсрол шинжлэх ухааны сайд Л.Энх-Амгалан оролцож байна. Тэрбээр яригдаж буй асуудлын талаар мэдээлэл өглөө.
“НҮБ-ын ерөнхий нарийн бичгийн дарга Антониу Гуттерешийн санаачилгаар энэ удаагийн уулзалтын хамгийн чухал сэдэв нь Хувьсаж буй боловсрол-Боловсрол дахь шилжилт. Монгол Улс НҮБ-ын гишүүн орны хувьд цахим шилжилтийг хэрхэн амжилттай хийж буй болон Ковид-19-ийн үед хэрэгжүүлсэн төслүүд, ямар санал санаачилга байсныг дэлхийн улс орнуудтай хуваалцах ховор боломж тохиолоо.
НҮБ-ын чуулга уулзалтын үеэр 50 хүрэхгүй улс орон дэлхий нийтийн анхаарлыг боловсролд хандуулах таван чиглэл байгааг онцолсон.
Нэгдүгээрт сургуулийн тухай ойлголт, үйл ажиллагаа, сургуулиас хүүхдүүд мэдлэг авах, мэдлэгээ түгээх арга хэмжээг хэрхэн зохион байгуулах, хичээлийг хайбрид буюу холимог хэлбэрээр/танхимын танхимын бус/ явуулах шаардлага үүсэж буй шинэ концепцүүдийг ярьж байна.
Хоёрдугаарт багшийн хөгжлийн асуудал. Дэлхий нийтэд багшийн хүний нөөцийн дутагдал их. Багшийн боловсролд гүйцэтгэж буй үүрэг шинэчлэгдэж байгаа юм байна. Багш нар ангид орж ирээд самбарын өмнө зогсоод хичээл заадаг бус, хүүхэд бүрийн өвөрмөц сурах хэрэгцээг дэмжсэн шинэ хандлагууд бий болох ёстойг ярилаа.
Гуравдугаарт хичээлийн хөтөлбөр. XXI зууны иргэдийг ямар мэдлэг ур, чадвар, төлөвшлөөр сургах вэ гэдэг асуудал. Ковид-19-ийн үед чухал сэдэв болж буй. Энэ асуудлаар улс орнууд туршлагаа хуваалцлаа.
Дөрөв, тавдугаарт боловсролын цахим шилжилт болон санхүүжилт. Боловсролд зарцуулж буй нэг долларыг хэрхэн өгөөжтэй, хүртээмжтэй, чанартай болгох талаар улс орнуудаас туршлага хуваалцсан арга хэмжээ болж байна” гэв.
Түүнчлэн энэ арга хэмжээ Нью-Йоркт зохион байгуулагдаад өнгөрч буй биш өнгөрсөн хавраас Бангкокт зохион байгуулагдсан Азийн боловсролын салбарт хийгдэж буй хувьсал, долдугаар сард манай улсад болсон үндэсний хэмжээний хэлэлцүүлэг бий.
Үндэсний хэмжээний хэлэлцүүлэгт хувьсаж буй боловсрол гэж юу вэ, Монголын хөгжил дэвшилд боловсролын үзүүлэх үүрэг, монгол иргэд боловсролоор дамжуулан ямар боломжуудыг олох ёстойг ярилцсан, 460 гаруй мянган, багш, залуучууд, хүүхдүүд оролцсон юм. Уг хэлэлцүүлгээс гаргасан зөвлөмжийг есдүгээр сард Парист хэлэлцүүлсэн. Үүний дараа Нью-Йоркт хүрэлцэн ирж Монгол Улс хувьсан буй боловсролд хийж байгаа шинэ туршлагаа ярилцсаныг БШУ-ы сайд дурдлаа.
Дэлхий нийтээр хүртээмж гэхээсээ илүүтэй чанартай боловсролыг хүүхэд бүрд хэрхэн хүргэх сорилтын өмнө байна. Монгол Улс боловсролд ДНБ-ий 4.5%-аас багагүй мөнгийг зарцуулдаг. Энэ мөнгө үр ашигтай, хүртээмжтэй, хүүхэд бүрд хүрсэн чанартай боловсролын санхүүжилтийн тогтолцоо мөн эсэхийг ярилцжээ.
Уг хуралд дэлхийн Хүн амын сангийн тэргүүлэх орнууд, НҮБ-ын байгууллагууд, ЮНЕСКО, UNICEF-ийн удирдах албан тушаалтнууд оролцжээ.
