Ням гарагт болсон Италийн парламентын сонгуульд хэт барууны үзэлтэй улс төрч Жоржиа Мелонигийн “Италийн ахан дүүс” намын тэргүүлсэн эвсэл ялах нь тодорхой болжээ.
Ерөнхий сайд асан Маттео Салвинигийн Лиг, Сильвио Берлусконигийн Форза Италиа намуудыг нэгтгэсэн энэхүү эвсэл сонгогчдын 41-45 хувийн санал авсан нь урьдчилсан дүнгээс харагдаж байна.
Ингэснээр 2018 оны өмнөх сонгуульд 4 хувийн санал авч байсан “Италийн ахан дүүс” нам 22.5-26.5 хувийн санал авч, намын дарга Жоржиа Мелони нь Италийн түүхэнд анхны эмэгтэй ерөнхий сайд болох боломжтой болно.
“Италийн ахан дүүс” нам фашист дарангуйлагч Муссолинигийн үзэл баримтлал дээр анх бий болсон гэгддэг. Жоржиа Мелони залуудаа Муссолинигийн шүтэн бишрэгч байсан гэх яриа бий.
Ром хотын уугуул, ажилчин ангиас гаралтай, 45 настай Мелони нам нь фашист үзэл санаатай байсныг дурсахаас зайлсхийж, ерөнхий консерватив үзэл санааг тунхаглаж байгаа.
Тэрбээр Украины асуудлаар Өрнөдийн орнуудын бодлогыг дэмжихээ илэрхийлж байв. Өмнө нь Италийг Европын Холбооны нэгдсэн валютын системээс гаргахыг уриалдаг байсан Мелони сүүлийн жилүүдэд энэ тал дээр аядуу байр суурь илэрхийлэх болсон юм.
2008 онд Берлусконигийн засгийн газарт сайдын албан тушаал хашиж байсан туршлагатай Мелонийг эрчим хүчний хямрал, инфляц зэрэг маш хүнд сорилтууд хүлээж байна.
Тэрбээр сонгуулийн үеэр Итали руу ирэх дүрвэгсдийн урсгалыг зогсоохоо амлаж, бэлгийн цөөнхийн эрхийн эсрэг агуулгатай зүйл ярьж байв.
Зүүн төвийн үзэл баримтлалтай Ардчилсан Нам түүнийг “ардчиллын дайсан” гэж нэрлэж байсан удаатай.
Улс төрийн тогтворгүй байдлаараа алдартай Итали улс 1946 оноос хойш 68 дахь засгийн газраа байгуулах гэж байна.
Мелонигийн тэргүүлэх шинэ засгийн газрыг аравдугаар сарын дундаас өмнө байгуулагдаж амжихгүй гэж ажиглагчид үзэж байгаа юм.
Эх сурвалж: AFP
