Карибын тэнгисийн арал улс Хайти гадаад орнуудаас цагдаагийн тусламж хүсэхээр төлөвлөж байгаа тухай албаны эх сурвалжууд мэдээлжээ. Тус улсын түлш шатахуун импортолдог гол боомтыг орон нутгийн зэвсэгт дээрэмчдийн бүлгүүд хяналтдаа авсны улмаас эдийн засгийн ноцтой хямрал үүсээд байгаа.
Хайтийн засгийн газар түлш шатахууны үнийн татаасаа цуцлахаар болсон нь зэвсэгт бүлэглэлүүдийг хилэгнүүлж, ийм арга хэмжээ авахад хүргэсэн юм. Үүний улмаас Хайти даяар эрчим хүчний хомсдол үүсэж, ундны усны түгээлт, нийтийн тээвэр тасалдаж, эмнэлгүүд ажиллах боломжгүй болоод байна.
Үүний улмаас хүн амын дунд халдварт холер өвчин дэгдсэн тухай мэдээ ирж байгаа.
Өнгөрсөн Пүрэв гарагт тус улсын засгийн газар ерөнхий сайд Ариэл Анрид “олон улсын түншүүдээс хууль сахиулах тусгай хүчний тусламж хүсэх эрх” олгосон тухай эх сурвалжууд мэдээлж байна. Гэхдээ албан ёсны хүсэлтийг одоогоор гадаадын аль нэг улсын засгийн газарт тавиагүй байгаа гэнэ. Гадаадын тусгай хүч нь дээрэмчдийн гарт орсон шатахуун импортлох боомтыг чөлөөлөх үүрэг гүйцэтгэх юм байна.
Хайти улсын гадаад хэргийн сайд Жан Виктор Женюс өнгөрсөн Баасан гарагт Перу улсын нийслэл Лима хотод болсон Америк Тивийн Орнуудын дээд чуулганы үеэр цагдаагийн хүчний тусламж хүссэн тухай хэвлэлүүд мэдээлжээ.
НҮБ-ын Ерөнхий нарийн бичгийн дарга Антонио Гутерреш энэ сарын 9-нд олон улсын хамтын нийгэмлэгт хандан Хайтид тулгарч буй хямралыг шийдвэрлэхийн тулд олон улсын мэргэшсэн арми илгээх асуудлыг яаралтай шийдвэрлэхийг уриалсан байна.
Мөн өдөр НҮБ-ын Ерөнхий нарийн бичгийн даргын хэвлэлийн төлөөлөгч Стефан Дюжаррик мэдэгдэхдээ, “Гутерриш Хаити дахь нөхцөл байдлыг маш их анхаарч байна. Тус орны аюулгүйн нөхцөл байдал эрс муудсанаас улс орон нь дампуурлын ирмэгт тулж, дээр нь холер өвчний дэгдэлт эхэлсэн байна. Түлшний нийлүүлэлт саатсанаас ундны усны тээвэрлэлт зогсож гоц халдварт өвчнөөс урьдчилан сэргийлэх нэн чухал үйлчилгээнүүд зогсонги байдалд ороод байна. Иймийн тулд Гутерриш олон улсын хамтын нийгэмлэгт хандан Хаитигийн засгийн газрын хүсэлтийг яаралтай авч үзэн, тус улс руу мэргэжлийн олон улсын цэргийн хүч илгээж, ундны ус, түлш, хоол хүнс, эмнэлгийн хэрэгслээр яаралтай хангахыг уриалсан байна” гэв.
