Төрийн байгуулалтын Байнгын хороо өчигдөр ирэх оны төсвийн хоёр дахь хэлэлцүүлгийг хийв. Энэ үеэр УИХ-ын Тамгын газрын төсвийн асуудал хөндөгджээ.
Тодруулбал 2023 оны төсөвт суулгахаар тус газрын төсөвлөж оруулсан хөрөнгө оруулалтын зардал болох 3.5 тэрбум төгрөг 100 хувь хасагджээ. Энэ мөнгө нь УИХ-ын хуралдааны цахим системийн шинэчлэлд зориулагдах зардал байсан аж. Мөн 2.4 тэрбум төгрөгийн урсгал зардал хасагдсан байна.
Энэ талаар УИХ-ын Тамгын газрын дэд дарга С.Батбаатар “Одоо хуралдааны танхимуудад ашиглаж байгаа тоног төхөөрөмж буюу микрофонт гар 10 гаруй жил болсон, үйлдвэрлэгдэхээ больсноос сэлбэг хэрэгсэл нь олдохгүй болсон.
2022 онд чуулганы нэгдсэн хуралдааны танхимын төхөөрөмжийг солих мөнгө төсөвт суусан. Одоо бусад танхим дахь микрофонт гарыг солих шаардлага байгаа. Энэ төхөөрөмжийг авах захиалга өгснөөс хойш зургаан сарын дотор үйлдвэрлэгдэн нийлүүлэгддэг.
Бидний өгсөн захиалгын дагуу үйлдвэрлэгдэж байгаа бөгөөд оны дараа чуулганы нэгдсэн хуралдааны танхимын микрофонт гарыг суурилуулах ажил хийгдэнэ.
Харин бусад танхимуудад тавигдах зардал ирэх оны төсөвт сууж, бид захиалга өгч үйлдвэрлэх ажил хийгдэхгүй бол шинэчлэлийн ажил 2025 он хүртэл хойшилж, хуралдааны хэвийн үйл ажиллагаа алдагдах эрсдэл үүсэх болоод байгаа”-г хэллээ.
УИХ-ын гишүүн Г.Ганболд “Улсын Их Хурлын хяналт шалгалтын тухай хууль хэрэгжиж эхэлснээс хойш УИХ-ын гурван Түр хороо байгуулагдсан. Байгуулагдаад дөрөв, таван сар болоод байхад үйл ажиллагаа явуулах зардал байхгүй. Үүнээс болоод түр хороодын ажил урагшилдаггүй. Ирэх онд УИХ-ын хяналт шалгалтын үйл ажиллагаанд хэдий хэмжээний төсөв суулгасан бэ?”
УИХ батлагдсан төсөвтөө багтаагаад ажлаа хийгээд явна
Сангийн сайд Б.Жавхлан “Төрийн хэмнэлтийн хуулийг бид өөрсдөө хэрэгжүүлж эхэлнэ. УИХ, Засгийн газар аль аль нь. Түр хороо тухайлсан шаардлагаар байгуулагддаг. Тэр үед улсын төсөв батлагдчихсан байдаг. Ирэх онд хэдэн Түр хороо байгуулагдахыг бид мэдэхгүй. УИХ батлагдсан төсөвтөө багтаагаад ажлаа хийгээд явна.
2022 оны төсөвт Түр хороодын үйл ажиллагаатай холбоотой төсөв байгаагүй. УИХ-ын зарим гишүүн хувиасаа мөнгө гаргаж ажилласан нь үнэн. УИХ-ын гурван Түр хороо бүгд төсөвгүйгээр үйл ажиллагаагаа явуулсан.
Бид энэ жил байгуулагдан ажиллаж буй Түр хороодын зардлыг дундажлан тооцоод ирэх оны төсөвт 480 сая төгрөг тусгасан ч 50 хувь хасагдсан” гэв.
