Өчигдөр буюу 10 дугаар сарын 30-ны өдөр Төв аймгийн хойд болон зүүн талын сумдын нутгаар их хэмжээний цас орж, цасан шуурга шуурсны улмаас нийслэлээс зүүн аймгуудыг чиглэсэн А0501 замд халтиргаа гулгаа үүсэн зорчих хөдөлгөөнд эрсдэл үүссэн байна.
Тиймээс Улаанбаатар-Хэнтий, Улаанбаатар-Сүхбаатар, Хэнтий-Улаанбаатар чиглэлийн хүн тээврийн гурван автобус шөнийн цагаар замаа үргэлжлүүлэх боломжгүй болж, Багануурт саажээ. Тэдгээр автобусанд зорчиж буй иргэдийг Багануур ХК-ийн Уурхайчин спорт цогцолбортоо буудаллуулан ор дэвсгэрээр ханган хонуулжээ.
Гурван автобусны 125 зорчигчийн 70 нь Уурхайчин спорт цогцолборын зааланд байрласан аж. Үлдсэн хүмүүс нь Багануур дүүрэгт байдаг төрөл садангийн айлуудаа зорьсон байна.
Замын эрсдэлт нөхцөл байдлаас шалтгаалан Уурхайчин спорт цогцолборт хонож буй иргэдэд шаардлагатай гудас хөнжил зэргийг Багануур ХК-ийн Гамшгаас Хамгаалах Штабын бэлэн байдлын агуулахаас хангаж, даарч хөрсөн зорчигчдод тус компанийн үйлдвэрийн эмч нар анхан шатны эрүүл мэндийн үзлэг хийжээ.
