МҮЭ-ийн холбооноос Монголдоо хөдөлмөрлөж сайхан амьдрах нөхцлийг бүрдүүлэхийн төлөө “Улсын төсөв-2023” иргэд хөдөлмөрчдийн цуглааныг Төв талбайд зохион байгуулж байна. Уг жагсаалд оролцож буй иргэд үнийн өсөлттэй уялдуулан цалин хөлсийг нэмэхийг шаардаж байгаа юм. Иргэдийн байр суурийг хүргэе.
Иргэн-1: Хамгийн гол нь цалин хөлсийг инфляцын түвшинтэй уялдуулан нэмэгдүүлэхийн тулд жагсаж байна. Аль ч салбарт цалин хөлс ямар түвшинд байгааг бүгд мэднэ. Инфляц нь гаарч байхад цалин хөлс нь нэмэгдэхгүй байна. Төсөв юу юугүй батлагдах гээд байхад цалин хөлсийг ямар нэгэн байдлаар нэмнэ гэж ярихгүй байгаа юм. Миний хувьд эрүүл мэндийн салбарт ажилладаг. Эмнэлгийн ажилчдын цалин хөлсийг нэмнэ гэж хэлсэн ч нэмэгдээгүй л байна. Цалинг бага сага нэмсэн ч татвар өндөр байгаа учир гар дээр ирэх мөнгө нь бага байгаа юм.
Иргэн 2: Хөдөлмөрийн үнэлэмж маш доогуур байна. Залуус ажил хийхгүй байна, залхуу байна гэж их шүүмжилдэг. Үнэндээ хэн амьдралд хүрэлцэхгүй мөнгөөр ажил хийх вэ. Гадаадад очоод зүгээр л амьдардаг шүү дээ монголчууд. Бидний хөдөлмөрийн үнэлэмжийг нэмэх шаардлагатай байна.
Жагсаалыг зохион байгуулагчдаас дараах 13 шаардлагыг Засгийн газар, УИХ, УИХ-ын Төсвийн байнгын хороо, УИХ-ын Нийгмийн бодлогын байнгын хороонд хүргүүллээ.
-Цалин хөлсийг ялгаварлалгүй 50-иас доошгүй хувиар нэмэх
-Бага, дунд орлоготой иргэдийн хувь хүний орлогын албан татварын хөнгөлөх, амьжиргааны доод түвшингээс доогуур орлоготой иргэдийг татвараас чөлөөлөх
-Хөдөө орон нутагт ажиллаж байгаа нийт ажилчдыг ялгаварлалгүй 5 жил ажилласан хугацаа тутамд 6 сарын цалинтай тэмцэх хэмжээний тэтгэмж олгох
-Ажилчдад хувьцаа эзэмшүүлэх хөтөлбөрийг хэрэгжүүлэх
-Төсвийн байгууллагуудад ХАБЭА-н зардлыг тусгах
-Төрийн хэмнэлтийн тухай хуульд ажилтны эрх ашиг, цалин хөлс, хөдөлмөрлөх нөхцөл, нийгмийн асуудал зэрэг хамтын гэрээ, хэлэлцээрээр шийдвэрлэсэн зардлыг танахгүй байх нэмэлт өөрчлөл оруулах
-Үнийн өсөлтийг бууруулах, тогтворжуулах
-Тэтгэвэр өвлүүлж, тэтгэврийн даатгалын шимтгэлээс тэтгэвэр тогтоохдоо 7 жил болгосныг 5 жил болгох
-ЭМДС, НДС-ийн банкуудад алдсан өр төлбөрийг болон Хөгжлийн банкны зээлийн хүүг алдангийн хамт төлүүлэх
-Эрдэнэс тавантолгойн хувьцааны ногдол ашгийг олгох
-ЖДҮХС-ийн төсвийг хоёр дахин нэмэх
-Бага, дунд орлоготой иргэдэд ипотекийн зээлийн хүүгийн гурван хувийг эхний гурван жилийн хугацаанд хариуцахаар 2023 оны төсөвт тусгах
-Хөдөлмөрчдөд чиглэсэн аливаа хууль, шийдвэр нь ажил, албан тушаалаар ялгаварлан гадуурхахгүй байх.
Уг шаардлагыг хүлээж аваагүй тохиолдолд тэмцлийн дараагийн хэлбэрт шилжинэ гэдгийг жагсагчид онцоллоо.
