Нүүрсний хулгайг эсэргүүцэн жагсаж буй иргэд гурван шаардлагын дагуу ямар арга хэмжээ авч ажиллаж буйгаа Хууль зүй, дотоод хэргийн сайд Х.Нямбаатар өнөөдөр болсон Засгийн газрын ээлжит бус хуралдааны дараа мэдээлэл өгөх үеэрээ танилцуулав.
Жагсагчид
- нүүрсний хулгайн хэрэгт оролцсон хүмүүсийг зарла
- нүүрсний хулгайтай холбогдсон хүмүүст бүгдэд нь 15 жилийн ял өгөөд, хөрөнгийг нь улсын орлого болго
- КОВИД-19-ийн төсвийг олон нийтэд ил тод болго гэх шаардлага тавьсаар байгаа.
Энэ дагуу Засгийн газраас өнөөдөр КОВИД-19 цар тахлын үед зарцуулсан бүх төсвийг ирэх долоо хоногт олон нийтэд нээлттэй зарлаж, цахим хуудсанд байршуулахаар болжээ.
Хууль зүй, дотоод хэргийн сайд Х.Нямбаатар “Жагсагчдын тавьсан хоёр шаардлага нь мөрдөн шалгах ажиллагааны явуулж байж олон нийтэд ил тод болгох асуудал бий. Мөрдөн шалгаж байж нүүрсний хулгай гэх хэрэгт ямар хүмүүс холбогдсон бэ гэдгийг шүүхэд шилжүүлж байж ил тод болгоно.
Харин хоёр дахь шаардлага нь ойлгомжгүй байгаа. Ял өгөх, хөрөнгө хураах нь шүүх эрх мэдлийн хүрээний асуудал. Жагсагчдын тавьсан шаардлагын дагуу мөрдөн шалгах ажиллагааг эрчимжүүлж байгаа.
Өмнөговь аймгийн Цогтцэций суманд 40 орчим мөрдөгч ажиллаж, өнөө өглөөнөөс хүмүүсээ дуудаж, асууж тодруулж байгаа. Мөрдөн шалгах ажиллагааг явуулахдаа экспортыг зогсоохгүй байх бүх талын арга хэмжээг авна. Тээвэрлэлтээ хийгээд буцаж ирсэн, амарч байх үед асууж тодруулах ёстой.
Мөрдөн шалгах ажиллагаатай холбоотой асуудалд маркшейдэрийн албыг өнөөдрөөс томилсон. Уул уурхайн хэмжилт хийдэг баг бүрэлдэхүүн Тавантолгойн болон жижиг Тавантолгойн олборлолт хийсэн талбай дээр он оноор нь уул ажлын төлөвлөгөөтэй нь уялдуулж, хэмжилт хийнэ. Ингэхдээ нийт хэр хэмжээний талбайд уулын ажлыг хийсэн бэ, хэд нь газрын гадарга дээр хөрс хуулалтын шороо болж үлдсэн, хэдэн сая тонн нүүрс олборлосон, түүнээс хэд нь коксожсон, хэд нь эрчим хүчний нүүрс вэ гэдэг хэмжилт хийж эхэлсэн” гэлээ.
Мөн хил гаалийн мэдээллийг тулгах ажил хийгдэж байгааг мэдээлэв.
