ОХУ-ын ерөнхийлөгч Владимир Путиний тушаалаар Вагнер хувийн зэвсэгт хүчний тэргүүн Евгений Пригожиний нисэх онгоцонд тэсрэх бөмбөг байрлуулсан байх өндөр магадлалтай гэх дүгнэлтийг Өрнөдийн тагнуулын албад гаргасан байна.
Пригожиний зорчиж байсан Embraer үйлдвэрийн нисэх онгоц Лхагва гарагт Москвагаас баруун хойд зүгт осолдсон юм.
Онгоцонд Вагнер группийн бусад өндөр албан тушаалтнууд зорчиж байсныг Оросын тал баталж байгаа.
Тэгвэл өчигдөр Кремлийн хэвлэлийн алба Өрнөдийн тагнуулын албадын дүгнэлтийг эрс няцаасан байна.
“Энэхүү ослын талаар, тэр дундаа Евгений Пригожин зэрэг онгоцонд зорчиж явсан хүмүүсийн эмгэнэлт үхлийн талаар олон янзын таамаг яригдаж байна. Мэдээж өрнөдийн орнууд энэ бүх таамгийг тодорхой нэг өнцгөөс харуулж байгаа. Энэ бүхэн огт худал юм” гэж Кремлийн хэвлэлийн төлөөлөгч Дмитрий Песков мэдэгджээ.
Вагнер групп болон бусад бүх хувийн армийн дайчдыг ОХУ-ын батлан хамгаалах яамны шууд удирдлагад шилжүүлэх зарлигт Путин өчигдөр гарын үсэг зурсан байна.
Пригожин өмнө нь ийм шийдвэрийг эрс эсэргүүцэж байсан юм.
Тэрбээр өмнө нь хоёр ч удаа үхлээ хуурамчаар зохион байгуулж байсан гэдэг. Тухайлбал 2019 онд түүнийг Ардчилсан Конго улсын нутагт онгоцтойгоо осолдсон тухай мэдээ тарж байжээ.
Мөн Пригожин гадаадад аялахдаа үргэлж зүсээ хувиргадаг, олон паспорт хэрэглэдэг гэсэн мэдээлэл бий.
Гэхдээ энэ удаа Оросын эрх баригчид түүний амийг хөнөөх хангалттай шалтгаан байсан юм.
Баасан гарагт Их Британийн батлан хамгаалах яамнаас гаргасан тагнуулын тайланд “Аюулгүй байдалдаа онцгой анхаарал тавьдаг Пригожин осолдсон онгоцоор зорчиж явсан гэх хангалттай баримт нотолгоо олдоогүй байна. Гэхдээ тэр үхсэн байх өндөр магадлалтай” гэжээ.
Пүрэв гарагт Путин ослын талаар анх удаа ам нээхдээ “Бид түүнийг санан дурсаж, хэзээ ч мартахгүй” хэмээн Пригожиний араас эмгэнэл илэрхийлж байв.
Путиний бие хамгаалагч асан, одоо Тула мужийн захирагч Алексей Дюмин өчигдөр бас Пригожиний араас гашуудлын үгс хэлсэн байна.
“Евгений Пригожинийг жинхэнэ эх оронч, зоригтой, шийдэмгий нэгэн байсныг би мэднэ. Тэр эх орондоо их зүйлийг хийсэн. Эх орон нь түүнийг мартахгүй. Бид ослоор амиа алдсан бүх хүмүүс болон дайнд амиа алдсан бүх Вагнерчуудын араас эмгэнэн гашуудаж байна” гэж тэр ярьжээ.
Пүрэв гарагт Вагнерын дайчид болон олны танил цөөн хүмүүс Санкт Петербург хотод Пригожиний дурсгалыг хүндэтгэх арга хэмжээнд оролцсон юм.
Гэхдээ Оросын албаныхан Вагнер групптэй холбоотой баримтуудыг устгах, мартуулах арга хэмжээ авч эхэлсэн нь зарим жишээнээс харагдаж байна.
Өчигдөр Песков сэтгүүлчидтэй уулзахдаа Вагнерын цаашдын хувь заяаны талаар ярихаас зайлсхийж, мөн тус компанийг хувийн армийн бүтэц, зохион байгуулалттай байсныг үгүйсгэсэн юм.
“Ийм бүтэц байгаагүй, Вагнер нь хувийн зэвсэгт хүчин байгаагүй. Зүгээр л Вагнер групп гэж байсан” гэж Песков энэ үеэр ярьжээ.
Үүнээс гадна эзлэгдсэн Крымийн хойгийн Миколайвка хот дахь Вагнерын дайчдын оршуулгын газрыг буулгаж буйг харуулсан дүрс бичлэг өчигдөр сошиал орчинд тарсан юм.
Орон нутгийн албан хаагчид булшны чулуун самбар, модон загалмайнуудыг цуглуулан овоолж байгааг энэ бичлэг харуулсан байна.
Бичлэгийг үйлдсэн Вагнерын дэмжигч “Энэ бол доромжлол. Оросын төлөө амиа зориулсан хүмүүсийн шарилыг хөндөхдөө та нар бурхнаас айхгүй байна уу?” хэмээн ярьж байжээ.
Вагнерын цэргүүдэд зориулсан түр байруудын заримыг буулгасан ч тэд нутаг дэвсгэрээс нь гарч явахгүйг Беларусийн ерөнхийлөгч Александр Лукашенко өчигдөр баталсан байна.
“Тэд хаашаа ч зугтахгүй. Бидэнд хэрэгтэй байгаа тохиолдолд тэд бидэнтэй хамт ажиллаж, амьдарсаар байх болно” гэж Лукашенко хэлжээ.
Пригожиний аюулгүй байдлыг хариуцаж байснаа үгүйсгэсэн тэрбээр бас онгоцны осолд Москвагийн эрх баригчдыг хамаатуулахыг хүсээгүй байна. “Өнөөдөр олон хүн Пригожиний үхлийн хариуцлагыг Путинд тохохыг оролдож байна. Гэхдээ тэр үүнд ямар ч хамаагүйг би мэднэ” гэж Лукашенко сэтгүүлчдийн асуултад хариулжээ.
Эх сурвалж: The Guardian
