АН-аас Үндэсний бодлогын хорооны хуралдаанаас гарсан шийдвэрийн талаар мэдээлэл хийлээ. Хуралд АН-ын дарга Л.Гантөмөр, АН-ын тэргүүн дэд дарга С.Баярцогт, мөн дэд дарга нар оролцлоо.
АН-ын дарга Л.Гантөмөр: Өнгөрсөн долоо хоногт АН-ын Үндэсний бодлогын хорооны хуралдаан болж, удирдлагын багаа томилсон. Мөн АН-ын улс төрийн зөвлөл байгуулагдсан.
Өнөөдрөөс уг зөвлөл АН-ын улс төрийн шийдвэр, бодлогыг гаргаж, танилцуулж явна. АН-ын анхан шатны сонгуулийг зохион байгуулах журмыг баталсан. Энэ есдүгээр сард анхан шатны байгууллагын дарга нарын сонгууль болно. Үүний дараа аймаг, нийслэлийнх явна, дунд шатны дарга нарыг сонгох ажил явагдана.
АН-ыг удирдаж байгаа дарга нар бүх аймаг, сумдад хүрч ажиллаж, нийт гишүүдийн саналыг авсан. Эднээс гол гарсан санал бол нэгд, АН эв нэгдэлтэй байж, бодлого шийдвэрээ гаргаж явах нь чухал байгааг хэлсэн. Тиймээс АН-ын ҮБХ-ны хурал эвтэй АН, нэгдсэн АН гэдэг бодлогод чиглэж хуралдсан.
Хоёрт, АН-д цус сэлбэж, шинэ залуу дараа үеийг гаргаж, АН-ыг авч явах залгамжлалыг бүрдүүлэх ёстой гэсэн санал гарсан.
Гуравт, төрийн хүнд суртал дийлдэхгүй боллоо. Бодлогын алдааг засч, төрийн шийдвэрийг иргэдэд ойртуулж, хүнд суртлыг багасгахад санал гарсан. Ерөнхийдөө энэ гурван саналд АН-ын шинэчлэл, бодлого, ҮБХ-ны хурал чиглэгдсэн.
АН-ын Үндэсний бодлогын хорооны хурлаас сонгогдсон 15 дэд даргын 9 нь 1980-иад оны залуус. Энэ дарга нар 2024 оны УИХ-ын сонгуулийг удирдах, бодлого гаргах гол ажлыг хийнэ. Дэд дарга нар аймаг, сумдад ажиллаж иргэдийн амьдралтай танилцаж, бодлого шийдвэрээ гаргана.
Улс төрийн зөвлөл болон гадаад харилцааг тэргүүн дэд дарга хариуцаж ажиллахаар бид тохирч байна.
Сүүлийн 33 жилд нэг нам хоёр сонгууль дараалж олонхи болсон тохиолдол сүүлийн найман жилд гарлаа. Энэ байдал цаашдаа удаан үргэлжилж бодитой сөрөг хүчингүй явбал Монгол Улс авторитари тогтолцоо руу шилжих эрсдэлтэй. Тиймээс одоогийн АН-ын удирдагийн өмнө маш хариуцлагатай үе ирж байна.
АН-ын тэргүүн дэд дарга С.Баярцогт: Монгол Улсын улстөрийн намын түүхэнд гурван том өөрчлөлт гарсан. Нэгд, Үндсэн хуульд өөрчлөлт орж, УИХ 126 гишүүнтэй болохоор болсон. Хоёрт, Улс төрийн намын тухай хууль, гуравт, Сонгуулийн тухай хуулийг баталсан. АН-ын ҮБХ-ны хуралдааны гол чиглэл бодлого энэ гурван хуулийн өөрчлөлт руу чиглэж явагдсан.
АН энэ удаагийн бодлогын өөрчлөлтөөрөө АН-ын хоёр дахь давлагааг эхлүүлж байгаа. Шинэ үеийн төлөөллүүд орж ирж байна. Манай анхдагчид 2024 оны сонгуулиар байр сууриа хоёр дахь үеийнхэндээ шилжүүлж байгаа шилжилтийн үе юм. Үүнийг манай нам ардчиллын дахин сэргэлтийн үе гэж нэрлэж байна. 1980, 1990 оныхон АН-ын удирдлагад шинээр орж ирж, бодлогын гол өөрчлөлт болно.
Сүүлийн 33 жилд нэг нам хоёр сонгууль дараалж олонхи болсон тохиолдол сүүлийн найман жилд гарлаа. Энэ байдал цаашдаа удаан үргэлжилж бодитой сөрөг хүчингүй явбал Монгол Улс авторитари тогтолцоо руу шилжих эрсдэлтэй. Тиймээс одоогийн АН-ын удирдагийн өмнө маш хариуцлагатай үе ирж байна. Ардчиллын баянбүрд гэдэг Монгол Улсыг энэ хэвээр нь авч үлдэх үү, хүний эрх хувийн өмч, чөлөөт зах зээл, жижиг Засгийн газар, авлигал хээл хахуульгүй төр гэдэг тогтолцоог хамгаалах, бэхжүүлэх, төгөлдөржүүлэх асуудал нь АН-ын үүрэг. Энэ оноос ийм бодлогын өөрчлөлтийг бид үзүүлнэ. АН, ардчиллын төлөөх намууд эв нэгдэлгүй байхдаа ялагдал хүлээдэг. Энэ эргээд улс орны хөгжилд сөргөөр нөлөөлдгийг өнгөрсөн долоон жилийн туршлага харууллаа. Энэ дээрээ үндэслэн шийдвэрүүд гаргасан. Одоо та бүхэн шинэчлэгдэж байгаа шинэ АН-ын тухай ярих болно.
АН-ын дэд дарга Ч.Өнөрбаяр: АН олон дэд даргатай боллоо гэдэг шүүмжлэл гарсан. Гэхдээ АН бол бүх түвшний оролцоог хангаж, АН-ын бодлогод оролцох боломжоороо хангаж байгаа юм. Миний хувьд хууль зүйн түвшний бодлогоор хангаж ажиллана. Өнөөдөр хууль биш, даргын засаглал нь ноёрхож байгаа нь нууц биш. Хууль дүрэм, шударга ёс үйлчилдэг нийгмийн төлөө ажиллана.
Мэдээллийн дараа сэтгүүлч ирэх 2024 оны сонгууль АН хэрхэн оролцох, нэр дэвшилт, намын жагсаалтад ямар зарчим баримтлахыг АН-ын дарга Л.Гантөмөрөөс асуулаа.
Уг асуултад “АН нэр дэвшилтийг гаргахдаа салбар, асуудлаа мэддэг, мэргэшсэн хүмүүсийг дэвшүүлэх бодлого барина. Жишээ нь, боловсрлын салбарыг төлөөлж чадах мэргэжлийн хүнийг дэвшүүлнэ, хөдөө аж ахуйн салбарыг хэн сайн мэдэж байна тэр хүнийг дэвшүүлнэ. Энэ байр суурийг хатуу баримтална. Төрийн бодлого ухаалаг байхын тулд Монголын парламент мэргэжлийн болох ёстой.
Хоёрт, жагсаалтад багтах хүмүүсийг сонгохдоо намын даргын үзэмжээр бус нийт АН-ын гишүүдийн санал, олон түмний дэмжлэгийг хамгийн өндөр авсан хүмүүсийг жагсаалтад оруулна” гэдгийг АН-ын дарга Л.Гантөмөр онцоллоо.
