/Reuters/. Азербайжан улс мягмар гарагт Арменийн хяналтад байдаг Уулын Карабах руу халдан довтолж, салан тусгаарласан тус бүс нутгийг цэргийн хүчээр буулган авахыг оролдсоноор хөрш Армени улстай дахин дайн үүсгэж магадгүй боллоо.
Өмнөд Кавказын уулархаг нутагт байдаг Уулын Карабах бол албан ёсоор Азербайжаны нутаг дэвсгэрт багтдаг бүс нутаг билээ. Гэхдээ түүний тодорхой хэсгийг салан тусгаарлагч арменичууд хянаж байгаа бөгөөд тэд энэ газрыг өвөг дээдсийнхээ нутаг гэж үздэг.
ЗХУ задран унасны дараа 1991 онд, мөн 2020 онд Карабахад хоёр удаа дайн дэгдэж байв. АНУ-ын Төрийн нарийн бичгийн дарга Энтони Блинкен цэргийн ажиллагаагаа нэн даруй зогсоохыг Азербайжанд уриалж, Бакугийн бүслэн хаах бодлогын улмаас Карабах дахь хүмүүнлэгийн нөхцөл байдлыг улам хүндрүүлж байна гэж мэдэгдлээ.
Европын Холбоо /ЕХ/, Франц, Герман улсууд мөн Азербайжаны цэргийн ажиллагааг буруушааж, Армени улстай Карабахын асуудлаар яриа хэлэлцээгээ сэргээхийг уриаллаа.
Азербайжанаар Ханкенди гэгддэг Карабахын нийслэл Степанакерт хот руу их буугаар тасралтгүй галлаж байгаа нь мягмар гарагт олон нийтийн сүлжээнд байршуулсан бичлэгээс харагдана.
“Манай хуурай замын цэргийн ангиуд хэд хэдэн газраар Арменийн хамгаалалтын шугамыг сэтэлснээр үүргээ биелүүлж чадлаа” гэж Азербайжан Улсын Ерөнхийлөгч Ильхам Алиевын гадаад бодлогын зөвлөх Хикмет Гажиев мэдэгдсэн байна. Гэвч Арменийн салан тусгаарлагчид энэ мэдэгдлийг үгүйсгэжээ.
“Азербайжаны зэвсэгт хүчин одоогийн байдлаар 60 гаруй хянан шалгах цэгийг эзлэн авч, 20 орчим байлдааны машин, техник хэрэгслийг устгаад байна” гэж Батлан хамгаалах яамны мэдэгдэлддурдсан байна.
Бакугийн цэргийн ажиллагааны улмаас 25 хүн амь эрсдэж, хоёр энгийн иргэн, 138 хүн шархадсан тухай Карабахын тал мэдэгджээ. Мөн зарим тосгоны оршин суугчдыг нүүлгэн шилжүүлсэн байна.
Одоогийн байдлаар Ройтерс агентлаг талуудын мэдэгдэл үнэн эсэхийг тодруулж чадаагүй байна.
Бакугийн энэ ажиллагаа нь Арменийг өргөн хэмжээний сунжирсан мөргөлдөөнд татан оруулж магадгүй юм.
Карабах дахь энэ удаагийн мөргөлдөөн нь газрын тосны ба байгалийн хийн хоолойнууд бүхий Өмнөд Кавказ дахь геополитикийн тэнцвэрт байдлыг өөрчилж магадгүй. Азербайжаныг дэмждэг Туркийн үйл ажиллагаа идэвхжиж буй энэ үед Орос улс Украины дайнд сатаарч байгаа хэдий ч тус бүс нутаг дахь нөлөөгөө хадгалахыг эрмэлзэж байгаа юм.
