ҮСХ-ны мэдээллээр өрхийн сарын дундаж мөнгөн орлого 2.3 сая төгрөг байна. Энэ нь өмнөх оны мөн үеийнхээс 417 мянган төгрөгөөр буюу 24 хувиар өсжээ.
Өрхийн орлого: 2015 оны үнээр илэрхийлсэн (өнөөгийн үнийн өсөлтийн нөлөөллийг эс тооцсоноор авч үзэхэд) нэг өрхийн сарын дундаж бодит орлого 1.2 сая төгрөг болж, 156 мянган төгрөгөөр буюу 14.3 хувиар нэмэгджээ.
Нийт бодит орлогын хэмжээ өмнөх оны мөн үеийнхээс 14.1 хувиар нэмэгдсэн байна. Үүнд:
- Цалин хөлсний бодит орлого 104.9 мянган төгрөгөөр буюу 17.8 хувиар,
- ХАА-н үйлдвэрлэлийн бодит орлого 26.1 мянган төгрөгөөр буюу 34.9 хувиар нэмэгдсэн нь голлон нөлөөлжээ.
Мөнгө, зээл: Mөнгөний нийлүүлэлт (M2) өнгөрсөн сарын эцэст урьдчилсан гүйцэтгэлээр 37.5 их наяд төгрөгт хүрч, өмнөх оны мөн үеэс 7.8 (26.1 хувь) их наяд төгрөгөөр өсжээ. Үүнд төгрөгийн харилцах 2.0 (33.5 хувь) их наяд төгрөгөөр, төгрөгийн хадгаламж 4.3 (33.9 хувь) их наяд төгрөгөөр өссөн нь нөлөөлсөн байна.
Гүйлгээнд гаргасан бэлэн мөнгө энэ оны нэгдүгээр сарын эцэст урьдчилсан гүйцэтгэлээр 1.2 их наяд төгрөг болж, өмнөх сараас 20.7 (1.8 хувь) тэрбум төгрөгөөр, өмнөх оны мөн үеэс 133.6 (12.9 хувь) тэрбум төгрөгөөр өсжээ.
Гадаад цэвэр актив өнгөрсөн сарын эцэст урьдчилсан гүйцэтгэлээр 9.0 их наяд төгрөг болж, өмнөх сараас 28.9 (0.3 хувь) тэрбум төгрөгөөр, өмнөх оны мөн үеэс 5.5 (2.6 дахин) их наяд төгрөгөөр өссөн байна.
Дотоод цэвэр актив 28.5 их наяд төгрөг болж, өмнөх сараас 171.0 (0.6 хувь) тэрбум төгрөгөөр буурч, өмнөх оны мөн үеэс 2.2 (8.5 хувь) их наяд төгрөгөөр өсжээ.
Төгрөгийн хадгаламж 17.1 их наяд төгрөгт хүрч, өмнөх сараас 14.7 (0.1 хувь) тэрбум төгрөгөөр, өмнөх оны мөн үеийнхээс 4.3 (33.9 хувь) их наяд төгрөгөөр өсжээ.
Төгрөгийн хадгаламжийн 14.5 (84.8 хувь) их наяд төгрөг нь иргэдийн хадгаламж, 2.6 (15.2 хувь) их наяд төгрөг нь аж ахуйн нэгж, байгууллагын хадгаламж байна.
Валютын хадгаламж 4.9 их наяд төгрөг болж, өмнөх сараас 66.0 (1.3 хувь) тэрбум төгрөгөөр, өмнөх оны мөн үеэс 539.6 (9.9 хувь) тэрбум төгрөгөөр тус тус буурчээ.
