Эдийн засгийн өнөөгийн нөхцөл байдал ба цаашдын төлөвийг өнөөдөр Эдийн засаг, хөгжлийн сайд Ж.Энхбаяр танилцууллаа.
Монгол Улсын эдийн засаг 2025 онд 6.8 хувь өссөн ч худалдаа, үйлчилгээний идэвх буюу дотоод эрэлт муу байгааг тэрбээр мэдээллийн эхэнд онцолсон.
Өрхийн орлого 2025 оны эцэст улсын хэмжээнд таван хувь нэмэгдсэн дүн гарсан ч энэ нь хот хөдөөд ялгаатай байгаа юм. Тухайлбал Улаанбаатар хотод амьдарч буй өрхийн орлого 2.2 хувь өссөн бол орон нутгийн өрхийн орлого 10.5 хувь нэмэгдсэн гэв. Үүнд хөдөө аж ахуйн гаралтай түүхий эд, мах, ноос ноолуурын үнийн өсөлт, орон нутагт ажиллаж буй албан хаагчдын цалингийн нэмэгдэл зэрэг нь нөлөөлжээ.
Гэхдээ 2025 оны эцэст инфляц улсын хэмжээнд 7.5 хувьтай байв. Харин өрхийн орлогын өсөлт улсын хүн амын тал нь амьдарч буй нийслэл хотод 2.2 хувь гарсан нь орлогын өсөлт инфляцыг гүйцэж чадахгүй байгааг харуулж байна.
Сайд Ж.Энхбаяр “2026 оны нэгдүгээр улирлын байдлаар инфляц 7.4 хувь байгаа. Үүн дотор хүнсний бүтээгдэхүүний инфляц 10 гаруй хувиар нэмэгдсэн нь анхаарал татаж байгаа. Энэ нь мах, хүнсний ногооны үнээс шалтгаалж байна. Мөн гадаад орчны нөлөөлөлтэй холбоотойгоор шатахууны үнийн өсөлт Монголын эдийн засагт мэдрэгдэж эхэлсэн. Шатахуунаар дамжиж суурь зардлын өсөлт гарч байна” гэлээ.
Харин улсын төсвийн орлого, зарлагын талаар тэрбээр “Улсын төсвийн орлого энэ оны эхний гурван сарын байдлаар 6.3 их наяд төгрөг байна. Эдийн засаг муудсан, төсвийн орлого багассан гэдэг нь үндэслэлгүй. Өнгөрсөн оны мөн үетэй харьцуулахад төсвийн орлого 2.5 хувиар өсөөд байгаа. Олдог орлого хэвийн, нэмэгдэлтэй байгаа.
Гэхдээ анхаарах ёстой зүйл нь тэтгэвэр, төрийн албан хаагчдын цалингийн нэмэгдэлтэй холбоотойгоор төсвийн зарлага 7.7 их наяд төгрөг болж, өмнөх оны мөн үеэс 1.2 их наяд төгрөгөөр буюу урсгал зардал 17.1 хувь өссөн. Багш, эмч нарын цалин, тэтгэврийн нэмэгдэл нь оны эхний улиралд улсын төсвийн тэнцлийг 1.4 их наяд төгрөгийн алдагдалтай гарахад нөлөөлсөн” гэлээ.
Ажлын байр хамгийн ихээр бий болгодог худалдаа, үйлчилгээний салбарын идэвхжил сул байгаа тул 2027 оны эдийн засгийн бодлого энэ салбарт чиглэнэ гэдгийг сайд Ж.Энхбаяр мөн онцлов. Цаашид хүнсний бүтээгдэхүүний үнэ нэмэгдэх, түүнээс шалтгаалсан инфляц нэмэгдэх бодит эрсдэл байгаа тул Засгийн газраас хариу арга хэмжээнүүд хэрэгжүүлэхээр төлөвлөснийг нэмж хэллээ.
