Нийслэлийн ИТХ-ын ээлжит бус XVII хуралдааны хоёрдугаар хэлэлцүүлэг Хангарьд ордонд болсон юм.
Хурлын үеэр ИТХ-ын гишүүн П.Ганзориг нийтийн тээврийн салбартай холбоотой зарим зүйлийг хотын дарга Х.Нямбаатараас тодруулав. Өмнөх хотын даргын хийж байсан судалгааны ажил, түүн дээр суурилсан тооцоолол алдагдсан эсэх тал дээр эргэлзэж байгаагаа гишүүн илэрхийлсэн юм. Цахилгаан автобусны урсгал зардлын үнэ өсөх биш буурах ёстой байтал шинэчлэгдсэн төслөөр нэмэгдэж орж ирсэнд гайхаж тайлбар хүслээ.
Энэ талаар хотын дарга Х.Нямбаатар “Өмнөх даргын хийсэн ажил, судалгааг үнэгүйдүүлсэн зүйл байхгүй. Нийтийн тээврийн төсөв огцом нэмсэн нь автобусны жолооч нарын цалин өсөж байгаатай холбоотой. Өмнө нь нэг сая төгрөгөөр цалинжуулж байсан бол одоо 3.5 сая төгрөг болгон нэмэхгүй бол энэ салбарт ажиллах хүн олдохгүй байна.
Хоёрдугаарт, ирэх сарын 15-наас нийтийн тээврийн төлбөр тооцооны шинэ системийг олонд танилцуулахаар төлөвлөж буй. Тодруулбал нийтийн тээврээр үйлчлүүлж буй зорчигчдыг толгойгоор нь мэдэрч тоолдог камерыг бүх автобусанд тавих юм. Ингэснээр тухайн зорчигчийн картных нь мэдээлэлтэй зөрж байгаа эсэхийг шалгах боломжтой болно.
Жолооч нарын нэрлэж заншсанаар “дэмбээ”-д өдөрт багадаа 30-40 мянган төгрөг цуглаж тэдний халаасны мөнгө нь болдог. Энэ хулгайг арилгахын тулд карт уншигч, камерын хяналт хоёрын мэдээлэл зөрөх ёсгүй. Ийм байдлаар далд байгаа, хүний халаас руу ордог орлогыг ил болгох зорилготой.
Бүх төрийн албан хаагчдад нийтийн тээврээр зорчсоны мөнгө гэж цалин дээр нь олгодог. Үүнийг болиулж ажилчдынх нь автобусны картыг цэнэглээд тэд үнэхээр нийтийн тээврээр зорчиж байгаа тохиолдолд оноо өгдөг систем рүү шилжихээр ярилцаж буй. Урьдчилсан байдлаар зарим автобусанд хоёр төхөөрөмж суулгасан туршилт хийж байна.
Би зарим үед нийтийн тээврээр зорчиж бодит байдалтай танилцаж байгаа. Жолооч нар намайг таньж байгаа ч хажууд нь зорчигчид бэлнээр мөнгө төлөх үед тоосон шинжгүй халаасны мөнгөө авч байна.
Нийтийн тээврийн чиглэл өөрчилсөн туршилтыг автобус картны уншилтын дата дээр үндэслэж хийсэн. Гэтэл нийт зорчигчдын 30 хувь нь л картаар явдаг нь батлагдсан. Энэ дата дээр мэдээлэл нь ордоггүй зорчигчид олон байдгаас бидний хийсэн туршилт олны хэл ам дагуулсан.
Нийтийн тээврийн салбар төрөөс татаас авахгүйгээр өөрийгөө санхүүжүүлэх чадамжтай болгохын тулд шинэчлэлийг заавал хийх ёстой” гэж ярилаа.
