Хууль зүй, дотоод хэргийн сайд Б.Энхбаяр, Төрийн нарийн бичгийн даргын албан үүргийг түр орлон гүйцэтгэгч Л.Нямгэрэл тэргүүтэй газрын дарга, мэргэжилтнүүдийн төлөөлөл Гадаадын иргэн, харьяатын газарт ажиллаж, албан хаагчидтай уулзлаа.
Энэ үеэр Гадаадын иргэн, харьяатын газрын дарга Н.Ууганбаяр виз, оршин суух зөвшөөрөл олголт, цахим үйлчилгээний нэгдсэн системийн үйл ажиллагааг танилцуулж, хууль тогтоомжийн хэрэгжилт, байгууллагын үйл ажиллагаатай холбоотой нэгдсэн мэдээлэл өгөв. Тухайлбал, Гадаадын иргэн, харьяатын газар нь 2024 оны байдлаар гадаадын иргэн, түүнийг уригч иргэн, аж ахуйн нэгж байгууллагуудад үзүүлдэг виз, зөвшөөрлийн үйлчилгээг бүрэн цахимжуулсан.
2021 оноос хойш нийт 200 мянга гаруй иргэнд цахимаар үйлчилгээ үзүүлсэн байна. Ингэснээр өдөрт дунджаар 240-520 иргэн биечлэн ирж үйлчлүүлдэг байсан нь 5-8 болж багассан, 100-150 хүсэлтийг цаасаар хүлээн авч шийдвэрлэдэг байсан бол 700-1100 хүсэлтийг цахимаар хүлээн авч шийдвэрлэлтийн тоо нэмэгдсэн. Түүнчлэн үйлчилгээний хүсэлтийг 5-10 хоногт шийдвэрлэдэг байсныг 3 хүртэл хоногт багтаан богино хугацаанд шийдвэрлэх болсон зэрэг цахимжилтын эерэг өөрчлөлтүүдийг танилцуулав. Мөн иргэн, аж ахуйн нэгжид үзүүлэх үйлчилгээний чанарыг олон улсын жишигт хүргэх, нээлттэй, ил тод, шуурхай, чанартай, хүртээмжтэй үйлчилгээ үзүүлэх нь байгууллагын гол зорилт гэдгийг онцлон тодотгов.
Тэрбээр, 2020 онд Монгол Улсын засгийн газар тэргүүлэх хэд хэдэн бодлого дэвшүүлсний нэг нь төрийн цахимжилт. Төрийн үйлчилгээг иргэдэд түргэн шуурхай, хүнд суртал, авлигагүйгээр үзүүлэх нь Монгол Улсын Засгийн газрын тэргүүлэх бодлого. Энэ бодлогыг богино хугацаанд амжилттай хэрэгжүүлж, цахимжилтын ажлыг манлайлж, тэргүүлж, шийдвэрлэсэн байгууллага бол Гадаадын иргэн, харьяатын газар гэж итгэл төгс хэлж чадахаар байна. Би Хууль зүй, дотоод хэргийн сайдаар томилогдоод 15 орчим улсын Элчин сайдуудтай уулзсан.
Уулзалтын явцад олон давтамжтайгаар хэлсэн нь асуудал нь Монгол Улс визийн асуудлаа цахимжуулж, гадаадын иргэдэд түргэн шуурхай, хүнд сурталгүй, аливаа хэлбэрийн авлига, ашиг сонирхлын асуудлаас ангид визийн асуудлаа шийдвэрлүүлдэг болсныг олон Элчин сайдууд онцлон сайшааж байсан. Энэ асуудлаа цаашид улам өргөтөж ажиллах нь нээлттэй, ардчилсан Монгол Улсын бодлого мөн байх гэдэг дээр бид санал нэгдэж байлаа. Тийм ч учраас энэ 7 хоногийн Засгийн газрын хуралдаанаар манай улс бүх төрлийн визийн цахимаар олгох шийдвэр гаргах гэж байгаа” гэлээ.
БИЧЛЭГ:
