Эмчийн жоргүй бол ямар ч эмийг олгохгүй гэх асуудлын талаар Эм, эмнэлгийн хэрэгслийн хяналт, зохицуулалтын газраас тодрууллаа.
Эмийн аюулгүй байдлын тандалт судалгааны газрын дарга П.Цэцгээ “Эм эмнэлгийн хэрэгслийн тухай хуулийн шинэчилсэн найруулга аравдугаар сарын 1-нээс мөрдөгдөж эхэлсэн. Тус хуульд биологийн идэвхт нэмэлт бүтээгдэхүүний чанар, аюулгүй байдлын зарчмын маш олон өөрчлөлт орсон.
Эмийг жороор олгоно гэх зохицуулалт 20-30 жилийн өмнө мөрдөгдөж байсан хууль. Энэ хуулийг дагаж гарсан Зөрчлийн тухай хуулийн зүйл заалтууд нэмэгдсэн. Жороор олгох тухай шинэ журам зохицуулалт нэмэгдээгүй гэсэн үг. Монгол Улсад 4200 эм бүртгэлтэй байна. Үүнээс 1800 орчим нь жоргүй олгодог. Энэ эмийн мэдээллийг https://licemed.mohs.mn/ порталаас харах боломжтой.
– Тэгэхээр иргэд өвчин намдаах, ханиадны эмийг жороор худалдаж авна гэсэн үг үү?
– Тухайлбал, Ибупрофен өвчин намдаах нь 100-600 мг гэх тунтай байдаг. Манай улсад 60 гаруй төрлийн ибупрофен байдаг. Үүнээс зургаан төрлийг нь жортой олгоно. Бага тунтай парацетамолын найрлагатай эмүүдийг жоргүй олгоно.
Жороор олгох эмийг худалдсан тохиолдолд эмийн санг 500 мянган төгрөгөөр торгоно. Өмнө нь бол 50 мянган төгрөгөөр торгодог байсан. Олон улсын жишгээр тарилгын эмчилгээг гэрээр хийдэггүй. Манай улсын иргэд гэртээ тарилгын эмчилгээг хийх хандлагатай байна. Эмийн чанар, хэрэглээ, аюулгүй байдалд анхаарах шаардлагатай байна.
Өмнө нь тарилгын эмнүүд жортой байсан ч хэрэгжилт хангалтгүй байсан. Одоо торгуулийн хэмжээ нь нэмэгдсэн.
-Иргэд өвчин намдаах эм олгохгүй байна гэсэн бухимдалтай байна. Шөнийн цагаар энэ эмийг уух шаардлагатай хүн яах вэ?
– Дахин хэлье, бага тунтай өвчин намдаах эмийг жоргүй олгоно. Шөнийн цагаар өндөр тунтай өвчин намдаах эмийг уух шаардлагатай бол Яаралтай тусламж төвд очиж бичүүлээд, 24 цагийн эмийн сангаас авч болно.
-Яг энэ тохиолдолд яаралтай тусламжийн төвийн ачаалал нэмэгдэхгүй юу?
-Эмийг хэрэглэхдээ нэгдүгээрт чанар аюулгүй байдал, эмийн зохистой хэрэглээг бодож байх хэрэгтэй. Эмийн хангамж, хүртээмжээс илүү чанар аюулгүй байдал маш чухал. Иргэд вирус, мөөгөнцрийн эсрэг эмийг эмчийн заавраар хэрэглэхгүй байгаагаас эмийн дасал болж байна. Судалгаагаар 2050 он гэхэд наад захын ялимгүй вирусийн өвчнөөр өвдөх хандлагатай байна. Дур мэдэж эм хэрэглэх нь иргэдийн амь насанд аюул учруулж байна.
Иргэдийн дунд нийтлэг хэрэглэж буй эмүүдийг https://licemed.mohs.mn/ сайтаас хайж үзэхэд терафлю, тайлол хот, виферон лаа зэрэг эмүүдийг жоргүй олгохоор байна.
