УИХ дахь МАН-ын бүлэг өнөөдөр хуралдав. Хуралдаанаар ирэх оны улсын төсвийн төслийг хэлэлцжээ.
УИХ дахь МАН-ын бүлгийн өнөөдрийн хуралдаанаар Төсвийн тухай хуульд нэмэлт оруулах тухай хуулийн төслийг хэлэлцэж, хуралдаанд оролцсон гишүүд хэлэлцэх нь зүйтэй гэж шийдвэрлэлээ. Бүлгийн хуралдаанаар хэлэлцсэн асуудлын талаар УИХ дахь МАН-ын бүлгийн дарга Л.Мөнхбаатар, Сангийн сайд Б.Жавхлан, УИХ дахь МАН-ын бүлгийн ажлын албаны дарга Б.Далхаасүрэн нар хэвлэлийнхэнд мэдээлэв.
УИХ дахь МАН-ын бүлгийн дарга Л.Мөнхбаатар: Өнөөдрийн бүлгийн хуралдаанаар Засгийн газраас яаралтай горимоор оруулсан, Төсвийн тухай хуульд нэмэлт оруулах тухай хуулийн төслийг хэлэлцлээ.
Цоо шинэ төсөв биш засварлагдсан төсөв байна.
Өнгөрсөн сарын наймны өдөр батлагдсан, Монгол Улсын 2025 оны Төсвийн тухай хууль болон хамт өргөн мэдүүлсэн хууль болон холбогдуулан боловсруулсан хууль тогтоомжид бүхэлд нь Монгол Улсын Ерөнхийлөгч бүрэн эрхийнхээ хүрээнд хориг тавьсан.
УИХ-аас Ерөнхийлөгчийн хоригийг хүлээж авсан. Хууль зүйн байнгын хороо, Төсвийн байнгын хороодоос ажлын хэсэг байгуулагдаж, 2025 оны төсвийн төслийг хэлэлцэхдээ нэг удаагийн, анхдагч хуулийн төслөөр зохицуулах хуулийн төсөл боловсруулсан юм. Гэвч тус ажлын хэсгийн боловсруулсан хуулийн төсөл гишүүдийн дэмжлэг авч чадаагүй.
Иймд 2025 оны төсвийг Засгийн газарт буцаах, хуулийг хүчингүй болгох шийдвэр УИХ-аас гарсан. Үүнтэй холбоотойгоор Засгийн газраас Төсвийн тухай хуульд нэмэлт оруулах тухай хуулийн төсөл өргөн барьсан. Энэ төслийг УИХ дахь МАН-ын бүлгийн хуралдаанаар хэлэлцэж яаралтай горимоор хэлэлцэх нь зүйтэй гэж үзлээ.
Сангийн сайд Б.Жавхлан: Засгийн газраас өргөн мэдүүлэх төсөв нь цоо шинэ төсөв биш засварлагдсан төсөв байх учир аймаг, нийслэл, сум, дүүргийн иргэдийн Төлөөлөгчдийн Хурал Монгол Улсын 2025 оны төсвийн тухай хуулийн төслийг батлагдахыг хүлээх шаардлагатай гэдгийг онцлов.
Хуулийн төсөлд “Улсын Их Хурал улсын төсөв, Ирээдүйн өв сангийн төсөв, Үндэсний баялгийн сангийн төсөв, Нийгмийн даатгалын сангийн төсөв, Эрүүл мэндийн даатгалын сангийн төсвийн тухай хуулийг хуульд заасан үндэслэлээр хүчингүй болгосон бол Засгийн газар холбогдох төсвийн төслийг Улсын Их Хуралд өргөн мэдүүлнэ.”
Аймаг, нийслэл, сум, дүүргийн иргэдийн Төлөөлөгчдийн Хурал тухайн шатны төсвийн төслийг дараагийн төсвийн жил эхлэхээс өмнө хэлэлцэн батална гэж төсөлд тусгажээ.
