Австралийн Квинсланд мужийн хойд хэсэгт болсон үерийн улмаас нэг эмэгтэй амиа алдаж, олон мянган хүн гэр орноо орхин нүүхэд хүрчээ.
Өнгөрсөн бямба гарагаас эхэлсэн аадар бороо мягмар гараг хүртэл үргэлжлэх төлөвтэй байгаа аж.
Амиа алдсан эмэгтэйг тус улсын Онцгой байдлын албаны аврах завиар тээвэрлэж байх үед завь мод мөргөж хөмрөн, осол гарчээ. Завинд байсан бусад таван хүн аюулгүй газарт хүрч чадсан байна.
Үерийн улмаас гол замын хөрсөнд нуралт үүсэж, аврах багийн ажиллагаа болон үерийн хамгаалалтын даланг бэхлэх ажил удааширчээ.
Таунсвиллийн орон нутгийн гамшгийн менежментийн багийн мэдээлснээр, усны түвшин нэмэгдсээр 2000 гаруй байшин үерт автах эрсдэлтэй байгаа аж. Зарим байшингийн хоёр давхар хүртэл усанд автах магадлалтай гэжээ. Албаны хүмүүс Таунсвилл хотын захын зургаан дүүргийн оршин суугчдыг ням гарагийн үд дунд гэхэд нүүхийг зөвлөсөн ч тэдний 10 орчим хувь нь үлдэх шийдвэр гаргасан байна.
Мөн үерийн улмаас гол замын хөрсөнд нуралт үүсэж, аврах багийн ажиллагаа болон үерийн хамгаалалтын даланг бэхлэх ажил удааширчээ. Зарим дүүргийн супермаркетууд хүнсний нөөц дуусаж буйгаа мэдээлсэн байна.
Нутгийн удирдлагууд оршин суугчдад үерийн усанд нуугдсан матруудын хөдөлгөөнийг анхааралтай ажиглаж, болзошгүй аюулаас сэрэмжлэхийг зөвлөжээ.
Учир нь Австралийн Квинсланд мужийн хойд хэсэг халуун орны уур амьсгалтай, гол мөрөн, намаг ихтэй бүс нутаг учраас матрууд элбэг байдаг.
Үерийн үед усны түвшин нэмэгдэж, амьтад өөрийн амьдрах орчноосоо гарч, хот суурин руу шилжих тохиолдол ихэсдэг ажээ.
Эх сурвалж: BBC
