УИХ-ын чуулганы хуралдаанаар Зээлийн мэдээллийн тухай хуулийн төслийг хэлэлцэж байна.
Иргэдийн зээлжих онооны сайн, муу үзүүлэлтээс хамаарч зээлийн олголт шийдэгдэнэ гэж ойлгогдож байна. Гэвч энэ нөхцөлд, худалдааны эргэлт бүрэн зогссон үед зээлжих оноог хэрхэн үнэлэх нь тодорхойгүй байна. Орлого тасарсан байхад зээлжих чадварын үнэлгээ хэрхэн бодитой гарах вэ гэдэг асуулт гарч байна.
Нөгөө талаас, зээлээ хугацаа хэтрүүлэн төлсөн иргэд “хар жагсаалт”-д орж, 6 жилийн турш санхүүгийн үйлчилгээнд хязгаарлагддаг байдал цаашид байхгүй болох нь. Мөн ахмад настнуудын хувьд зээлжих оноонд хамрагдахаас илүү, анхнаасаа зээл олгохгүй байгаа нь тэднийг системээс бүрэн тусгаарлаж, ялгаварлан гадуурхаж буй байдал үүсгэж байна. Энэ асуудлыг хэрхэн шийдэж байгаа вэ?
УИХ-ын гишүүн Н.Батшугар “Давагдашгүй хүчин зүйлс тохиолдсон нөхцөлд хар жагсаалтад оруулахгүй байх зохицуулалт Тогтоолын төсөлд тусгагдсан бөгөөд хар жагсаалт гэдэг ойлголт бүрэн байхгүй болно.
Түүнчлэн, зээлжих онооны систем нэвтэрснээр олон давуу тал бий. Иргэн өмнө нь зээлээ хугацаанд нь төлөөгүй бол зээлийн оноо буурна. Харин ирээдүйд зээлээ хугацаандаа төлж эхэлбэл зээлжих оноо нь нэмэгдэж, дахин боломжууд нээгдэх боломжтой юм” гэв.
УИХ-ын гишүүн Л.Мөнхбаясгалан “Монголын ард түмэн татвар төлөхийн тулд амьдарч байна. Зээлээс зээлийн хооронд амьдарч байна. Би 21 аймгаар ажиллах үеэрээ малчидтай уулзсан. Манай тойргын малчин ирээд тулгараад байгаа асуудлаа хэллээ. Тэрээр малчны зээл авсан ч зуд болсны улмаас малаа алдсан.
Ингээд банкнаас жилийн хугацаатай зээлийн хугацаа хойшлуулсан ч төлөх өдөр нь ирсэн. Аргаа бараад апликейшны зээл авч, банкны зээлээ нөхөж төлж байгаа гэв. Энэ үед зээлийн оноо яаж үйлчлэх юм” гэв.
